Буьгуьнлерде Украина еринде юретаган согыс спецоперациясында бизим аьскершилеримиз эм оьз эрки мен ортакшылык этетаганлар Аталыгымыздынъ кызыксынувларын эм Элимиздинъ кавыфсызлыгын канагатлап келедилер. Согыс оьзгерислери юрген ерде аьскершилеримиздинъ кызмети енъиллерден тувыл. Куьн сайын йигитлеримиз, оьз яс яшав-бактылары кавыфлыкта болувына да карамастан, аьр кайсымыздынъ да тынышлы яшавымыз уьшин душпанды каты согып келедилер.
Аьскершилеримиз алдына салынган борышын етимисли толтырувы бизди Элимиздинъ келеектегиси уьшин парахатлы этеди. Сондай коршалавшыларымыздынъ бириси – ердесимиз Айнадин Ябагиев.
Айнадин Ябагиев 2001-нши йылдынъ канътар айынынъ 28-нши куьнинде Липецк областиндеги Становлянский районындагы Елец каласында тувады. Доьрт ясларында онынъ аьели Ногай районынынъ Нариман авылына коьшеди. Ол А.Асанов атындагы ерли мектебин тамамлаган. Мектебте окув йылларында Айнадин нызамлы, тербиялы, куллыксуьер окувшылардынъ бириси болып оьсти. Мектебтинъ спорт эм ямагат яшавында белсенли катнасып келген. Окувды тамамлаган сонъ, 2017-нши йылда Балашов политехникалык лицейге туьседи. Окувдан сонъ ясты аьскер сырасына шакырдылар. Айнадин Алибий увылы Ростов областиндеги Новочеркасск каласында орынласкан Миллет гвардия аьскерининъ федераллык службасында кызмет кылган. 2022-нши йылдынъ курал айынынъ 18-нши куьнинде Новочеркасск каласында кызметин бардырувга контракт беркиткен. Курал айынынъ 28-нши куьнинде оьз йолдаслары ман согыс спецоперация юрген Украина ерине йол алады. Буьгуьнлерде Айнадин Ябагиев Донецк областининъ Мариуполь каласында оьз аьскерлик борышын яваплы толтырып келеди. Янъыларда киши сержанты Айнадин Алибиевичти службада етимисли коьрсетимлери уьшин етекшилеви кесек заманга тыншаювга йиберди.
Нариман авыл яшавшылары ердесин уьйкен суьйиниш пен хош коьрип алдылар. Увылынынъ Кудайдан куьн сайын аман-эсен кайтканын тилеген анасы Нурсият Алиевна увылын коьрип, бек суьйинди, ана коьзлери суьйинишли коьзясларга толдылар. Онынъ биревди де аямаган согыс оьзгерислери юрген ерден келуьвин аьсиретли саклаган абалары Земфира, Венера эм агасы Ильяс кенжепайлары аман-эсен келгенин коьрип, коьнъиллери коькке дейим коьтерилдилер, куьезге толдылар.
Коьп кетпей, Украина еринде юрген согыс спецоперациясынынъ катнасувшысы, авыл мектебининъ выпускниги аман-эсен келуьвине багысланып информатика сабагыннан окытувшысы Зульфия Баймурзаевна Кувандыковадынъ етекшилиги мен Нариман авыл А.Асанов атындагы мектебинде 8-нши класс окувшылары ман «Бизим заманнынъ баьтирлери» деген йигитлик дериси уйгынланып оьтти. Солай болып, 8 «а» класстынъ етимисли окувшысы Малика Шаникеева Айнадин Ябагиев пен мектеб азбарында Россиядынъ патшалык байрагын бирге коьтердилер. Согыс спецоперация катнасувшысы ман йолыгыс авылдынъ «Шолпан» балалар бавынынъ тербияланувшылары ман да озгарылды.
Коьп йыллар артта бизим аталарымыздай болып, оьз алдына салынган аьскерлик борышларын йигитлерше, оьзлерин аямай, толтырып келгенлердинъ бириси Айнадин Алибий увылын балалар кызыклы тынъладылар. Увыт айынынъ сонъында кыска заманга берилген тыншаювыннан сонъ, ердесимиз тагы да оьз согыс йолдасларына йол алды.
Сондай коршалавшыларымыз бар турып, Енъуьв бизики болаягына сенимди йоймаймыз. Шынты эрлеримиз, баьтирлеримиз япсарларды коршалавында турган шаклы Элимиздинъ келеектегиси коркынышсыз болаяк. Биз олар ман оьктемсиймиз эм аман-эсен уьйлерине кайтувларын йораймыз!
Г.Нурдинова.
Суьвретте: Айнадин Ябагиев.
