Согысувлар майданларда увыллар оьлгени элимизге энъ де кыйынлы сынав болады. Ким ойлаган, бизим яслар колларына савыт-садак алып, Аталыкты саклаган куьнлер келер деп? Буьгуьнлерде бизим йигитлер СВО сырасында йигитлерше согысадылар, олардынъ биревлери, оькинишке, савлай дуныяда тынышлык болсын деп, янларын бередилер.
Алан Саитов Донбасс еринде 2023-нши йылдынъ увыт айынынъ 23-нши куьнинде оьлген. Кайбиримизге де, тувган-кардашларына да сол зат – уллы кайгы. Алан мектебти Владикавказ каласында битирген, алтын медальге тийисли болган, сонъында Калининград каласында ФСБ япсарлык институтын кутарган. Алан Карелия ерине Петрозаводск каласына ислемеге кетеди. Уьш йыл ислеп, Шешен Республикасына кайтады, онынъ ата-анасы асылы ман бу ерден болган.
Аталыкты коршаламага заман келгенде, Алан ойланмады. Согыс аьрекетининъ ветераны, подразделение командири, майор Алан Саитов оьз борышларын яваплылык пан, алаллык пан толтырганы уьшин коьплеген медальлер мен савгаланган. Украина еринде нацистлер мен согысувларда ол йигитлерше янын берген.
Саитовлардынъ аьелинде эки миллет – ногай эм осетин аьдетлерине сый этилинеди, Сондай аьелде оьскен Алан йигерли болып оьсти, биринши орынга ол, ата-бабаларындай болып, намыслык, алаллык, йигерликти салатаган эди. Биз оьз элимиздинъ баьтирлерине сый этемиз, урыс майданларда ян берген йигитлеримиздинъ сыйына аьр заманда да тийисли болмага – бизим киели борыш.
Г.Бекмуратова
Суьвретте: А.Саитов.