Янъыларда РФ Президенти мен доьрт саьат узагында озгарылган пресс-конференция барысында савлай элимиз яшавшыларын парызлы вакцинациялав акында сорав коьтерилди. Сол акта эл басшысы толы явап берди.

Ол белгилегенлей, яшавшылар арасында вакцинациялав дережеси тоьмен болганга, коллективлик иммунитет кепленмегенге, авырганлар саны оьседи. Болса да, кайдай да болсын санкциялар кулланмага ярамайтаганы акында ашыклап айтты. «Аьдемлерди сыйламага тийисли. Аьрисининъ позициясына карамастан, айырым шаралар коьрилмеге кереклиги акында шыдамлы кепте анълатпага керек», – деди ол.
Акыйкатында да яшавшылар арасында вакцинация процедурасын тек 60 процентке ювыгы оьткен. Аьдемлер оны оьтпейдилер, биревдинъ соьзине иерип тувыл. Аьлиги вакытта тек вакцина авырувдан сакланув амалы экенине олар яктан артык эс те каратылмайды. Эгер, В.Путин айтканлай, халк арасында анълатув ислер юритилсе, законга негизленип санкциялар кулланылмаса, аьр аьдем оьз савлыгын бу кавыфлы авырувдан саклавда вакцинацияды оьтпеге керек деген ойга келер эди. «Суьймеген ас кустырар» дегенлей, зордан бир зат та эттирмеге ярамайды. Эл басшысынынъ, халк савлыгы акында каьрлеп, айтканы Россиядынъ аьр гражданине етеегине шекленмеймен. Вакцина алганлар баьримизге коьрим болсын, онынъ пайдасы болмаса, кавыфлыгы йок экенин анълайык.
Л.Уразаева.