Ногай районынынъ яс йигитлери элимиздинъ туьрли муьйислеринде Эл алдында эр борышын намыслы толтырадылар. Олардынъ сыраларында Уллы Енъуьвдинъ 75 йыллыгына багысланып, Россиядынъ калаларында оьткен парадларда катнасканлар да бар. Эр балады ийги аьдем этип тербиялав эм аьскерге йолга салув тыныш ислерден тувыл. Увылларын аьскерге йиберген аналар, оьзек те, аьвлети элди коршалав сыйлы исти бардырганына куьезленедилер эм оьктемсийдилер. Соны ман бирге олардынъ юреклерин тынышсызлык бийлейди.
Хатын-кызлар байрамыннан алдын аьскершилердинъ аналары Ногай ра- йон администрациясына шакырылдылар. Бу шатлыклы шарады уйгынлавда район Хатын-кызлар советининъ председатели Асият Манкаева коьп куьш салды. Келген конакларды хошламага биринши соьзди Асият Бадиевна район аькимбасынынъ орынбасары Баймагомед Ярлыкаповка берди. Оннан сонъ элимиздинъ тынышлыгын коршалаган йигитлердинъ аналарын РФ Язувшылар союзынынъ агзасы Салимет Майлыбаева байрам ман кутлады. Ол оьзининъ эки увылына багыслап язган ятлавын окып, йыйылганларга эситтирди. Мунда йыйылган хатынлар шаирдинъ ятлавын тынълап, сыдыралардагы тилеклерди ойлары ман оьз увылларына йорадылар. Бу шарага аьскершилердинъ аналары ак тастарлар байлап келгенлер. Сол да босына тувыл. Аналардынъ ак тастарлары кавгаласкан эр кисилерди токтаткандай куьши барын белгилейди. Соны да Салимет Майлыбаева эске салды. Оннан сонъ Санкт-Петербургтагы Согыс-космослык академиясынынъ 4-нши курсынынъ курсанты, Уллы Енъуьвдинъ 75 йыллыгына багысланган мерекели парадынынъ катнасувшысы Имам-Алидинъ тетеси Сайлав Оразова шыгып соьйледи. Ногайдынъ акыны Алибий Романов эм йырлавшы Зульфия Аджигеримова да буьгуьн коьп йылы соьзлер айттылар эм ярасык тавыслары ман йырлар йырлап, йыйылганлардынъ коьнъиллерине еттилер. А.Джанибеков атындагы орта мектебининъ окувшысы Авелина Менглиязова ятлав окыды. Шара барысында Асият Бадиевна Ваисовлардынъ аьелине увылы Вахит службасын бардырган аьскер боьлигининъ етекшилевиннен келген Разылык хатты окыды. Шатлыклы шарага оьзининъ анасын Хатын-кызлар байрамы ман кутламага Ногай районында орынласкан 03007 номерли аьскер боьлигинде службасын бардыратаган аьскерши Ибрагим Койлыбаев келди. Шарадынъ сонъында Асият Манкаева район администрациясынынъ атыннан аьскершилердинъ аналарына савкатлар тапшырды эм аналарга эл коршалавшыларды тербиялап оьстиргени уьшин савбол айтты. Бу шарадан конаклар йогары коьнъилде, юрегиндеги уьйкен разылыгы ман уьйлерине кайттылар.
Н.Кожаева.
Суьвретте: Ногай район администрациясынынъ кенъеслер залында.
