Дагестан Аькимбасы Сергей Меликов тыскы себеплерди эсте тутув ман байланыста республика экономикасынынъ оьрленуьвининъ берклигин канагатлав бойынша айырым туьзилген Оперативлик штабынынъ биринши кенъесин оьткерген.

Штабтынъ бас ниети – бас федераллык эм муниципаллык программаларын толтырувды иркуьвге карсылык этуьв, Дагестан уьшин маьнели деп саналатаган йолларды токтавсыз оьрлентуьвди канагатлав бойынша мониторинг юритуьв эм карарлар кабыл этуьв. Олай дегени, регионнынъ энергетикалык тармагын оьрлентуьв, газификация ислерин юритуьв, сув ман канагатлавдынъ берк тармагын туьзуьв, республикадынъ экологиялык берклигин демевлейтаган тазалав курылыслары ман сувды йиберуьв бойынша карарлар кабыл этуьв, билимлендируьв эм савлык саклав объектлерин оьрлентуьв болады.
«Болса да бу ерде тамак-азык эм энъ де баслапкы керекли товарлардынъ бааларына мониторинг оьткеруьв иси биз уьшин айлак та маьнели экенин анъламага борышлымыз. Аьли кайсы бир намыссыз сатувшылар оьтпектинъ баасын коьтеретаганы акында аьдемлер шагынадылар. Бийдай эм ун оьлшеми бизде керек шаклы былтырдан алып аьзирленген, эндиги сонынъ баасын оьстируьв уьшин халклар ара санкциялар кайдай сылтав болады экен? Яде доллардынъ баасы оьсуьви мен бир байланысы да болмаган баска туьрли энъ де керекли товарлардынъ бааларын оьстируьв ше? Олар намыссыз аьдемлер боладылар, оларды биз тавып, тийисли шаралар коьреекпиз. Эш бирев де «Кимге согыс, кимге келим» деген аьдет пен яшамага керек тувыл», – деп билдирген Дагестан Аькимбасы.
Тамак-азык эм энъ де керекли товарларга баалары оьсуьвин тергев акында йыйынды солай ок янъыларда Дагестан Оькиметининъ Председатели Абдулмуслим Абдулмуслимов та оьткерген.