Элимиздинъ сондай коршалавшылары турып, биз Аталыгымыздынъ келеектегиси уьшин парахатлы.
Буьгуьнлерде ясларымыз, оьз яс яшавын да аямай, Украина еринде юретаган согыс спецоперациясында ортакшылык этип, Элимизди душпаннан коршалап келедилер. Аьли алдышылыкта болган аьскершилеримиз эм оьз эрки мен кеткен ердеслеримиз, оьзлерининъ аьрекети мен аьскершилик борышын намыслы эм йигитлерше толтырувы ман оьз Элине алаллыгын, уьйкен суьйимин коьрсетип келедилер. Олардынъ йогары кеспилиги эм коьрсеткен йигитлиги акында буьгуьнлерде аьскершилеримиздинъ омыравларында яркырайтаган савгалары шайыт боладылар. Олар Элимиздинъ межелерин неонацистлерининъ намартлыгыннан коршалап келедилер. Сол ердеслеримиздинъ бириси Кизляр районынынъ Новокрестьяновка (Ямантен) авыл яшавшысы Далгат Ахмедович Кошманбетов болады. Ол 2022-нши йылдынъ кырк кийик айыннан алып Украина еринде юрген согыс спецоперациясында катнасып келеди.
Далгат Ахмедович 1986-ншы йылдынъ курал айынынъ 2-нши куьнинде тувган. Новокрестьяновка авыл орта мектебинде окып билим алган, оннан сонъ Россия Аьскерининъ сырасына шакыртылган. Аьскер сырасында кызметин Далгат Кошманбетовка 2004-нши йылда Калининград каласында орынласкан Балтика флотынынъ противовоздушная оборонасынынъ согыс ава куьшлерининъ аьскеринде оьтпеге туьсти. Аьскер сырасыннан кайткан сонъ, Далгат Ахмедович сылув ногай кызы Фатима ман бактысын байлап, аьел курды. Коьп заман кетпей, яс Каспийск каласында тенъиз пехотасынынъ 177-нши айырым полкында кызмет этпеге контракт беркитеди. Толы болмаган мобилизация басланувы ман ердесимиз согыс спецоперация юрген ерине оьз йолдаслары ман йол алды. Буьгуьнлерде Далгат Ахмедович Запорожье областинде алдышылыкта болып Аталыгымыз алдында аьскерлик борышын йигитлерше толтырып келеди.
Тувган юртында, авылында Далгатты онынъ суьйикли аьели, айтпага, онынъ ян косагы Фатима, эки увыллары Абдул-Малик эм Абу-Бакр аьсиретли куьтедилер. Баска болып, увылынынъ тувган ерине Енъуьв мен кайтувын онынъ атасы Ахмед, уьйкен агасы Джамбулат, суьйикли акайы Тенъизбай саклайдылар. Оьзининъ ердеси, ерли мектеб выпускниги Далгат Кошманбетов пан тувган авылында, билим алган мектебте бек оьктемсийдилер, яс несил болса, сондай ясларга тенълесип, олардан коьрим алмага шалысадылар.
Элимизге кыйын заман тувганда, бир иркуьвсиз, Аталыгына алаллыгын коьрсетип, оны коршаламага коьтерилген сондай ясларымыздынъ ак ниетли иси яс несиллерге дайымларга коьримли уьлги болып келеек. Биз олардынъ аьр кайсысы ман да оьктемсиймиз. Элимиздинъ сондай коршалавшылары турып, Аталыгымыздынъ келеектегиси парахатлы болаягына шек йок. Аталарымызга, аналарымызга, баьри россияншылардынъ юреклерин оьктемлик пен толтырган, Элимиз кыйын шагында таянган сондай йигерли эм алал ясларды тербиялаганы уьшин уьйкен разылыгымызды билдиремиз.
Олардынъ савлайы да аман-эсен уьйлерине Енъуьв мен тез арада кайтканын йораймыз.
Гульмира Нурдинова.
Суьвретте: Далгат Кошманбетов.