Юрек – аьдем шаркынынъ кан ювырысын канагатлайтаган муьше, эм бир куьннинъ ишинде уьйкен куллык этеди. Бир куьн эм кеше ишинде юректен оьтетаган каннынъ оьлшеми 7-10 литр болады. Бир йыл ишинде юрек маразы элимиздинъ 900 мынъ аьдемининъ яшавын аькетеди. Россияда юрек пен байланыслы авырувлар 17 миллион аьдемде бар. Аьлиги медицина юрек маразларын эмлеп болады, ама коьп зат бизим эткен исимизге бойсынады. Бек маьнели оьз алдына аьдем юрегининъ савлыгын саклавы: дурыс тамакланув, савлыгына зарар келтиретаган таьмекиди эм спиртли ишимликлерди кулланувды коюв, таза авада кыдырув. Йогарыда белгиленгенлей, дурыс тамакланувдынъ маьнеси бек уьйкен, сога коьре юрекке пайдалы болган 2 туьрли азыктынъ аьзирлевининъ йосыгын коьрсетемиз:
– курытылган куьреге, коьгем эм кишмиштен 300 граммнан алып бас деп йылы сув ман ювынъыз, сонъ кайнаган сув ман шайканъыз, оннан сонъ 1-2 саьат сувык сувда койынъыз. Бир-эки саьаттен сонъ оларды шайкап, кептиринъиз. Эт увататаган алаттан шыгарып, 300 грамм бал косынъыз. Аьзирлеген азыкты сисе савытка куйып холодильникте койынъыз эм оннан куьн сайын 1-ер уьйкен касык ашанъыз;
– кишмиштен, финиклерден, курытылган куьрегеден, коьгемнен аьрисиннен 300 грамм алып ювып, курытып, алатлар ман уватынъыз. Оларга бир стакан козлар, солай ок 1 лимонды уватып косынъыз эм 300 грамм бал куйынъыз. Аьзир азыкты холодильникте сакланъыз.
Денинъиз савболсын!
Аьзирлеген Н.Эрежепова.