Язлык – ол баьри затларга да ян энуьв эм келеекке сеним этуьв заманы болады. Табиаттынъ сол ярасыклы мезгили мен коьп туьрли байрамлары белгиленип келедилер. Айтпага, Сабантой, Навруз эм сондай баска байрамлары.
Астраханьде юрт ногайларында «Амиль» байрам белгиленеек. Байрам Астрахань областининъ халк маданиятынынъ илми-методикалык орталыгынынъ миллет азбарында бу йылдынъ навруз айынынъ 20-ншы куьнинде 11 саьатте уйгынланып оьтеек.
Тамырлары ман алыс аьвелгиден келген язлык байрамы юрт ногайларында белгили байрамларынынъ бириси деп саналады. Ол юрт ногайлары яшаган ерлерде навруз айынынъ 15-нши куьниннен 24-нши куьнине дейим озгарылып келген. Оьзининъ календарьлик маьнесине коьре, байрам Янъы йылдынъ келуьвин белгилеген. Байрамда картлардан алып балаларга дейим баьри яшавшылар да катнасып келгенлер. Сыпырада келеек йылда куьнди, онъайлыкты эм берекетти белгилеп коьрсеткен бас аслардынъ бириси плов эм кабактан этилген боьреклер сыйлы орынды алганлар. Байрам катнасувшылары шарага йыйылганлардынъ коьнъилин саз алатларында ойнавы ман, йырлар, сарынлар оьнерли йырлавы ман, биюви мен юбантпага шалысадылар. Байрам майданларында эр йигитлер куьшин эм усталыгын сынап, ок атув, ат шабыс базласувларында катнасып келгенлер. Язлык байрамы Астрахань ногайларынынъ миллет маданият козгалысынынъ аьрекетлеви мен Приволжский районынынъ юрт авылларында оьтеди. Байрамнынъ оьрленип келуьви миллет аьдетлери саклавга эм оларды келеятырган яс несилге коьшируьвге уьйкен демевлик этип келеди.
«Амиль» байрамынынъ программасында Дослык уьйининъ яратувшылык коллективлери, «Тулпар» деген халк биюв ансамблининъ, «Лира» деген вокал куьбининъ катнасувшылары оьз усталыкларын коьрсетеек- лер, кол усталыклардынъ туьрли кеплери бойынша мастер класслары, ногай халк ойынлары, сонынъ ишинде «Табан-тирес», «Алтын кабак» деген ок атув ярысы, ногайлардынъ уьйшилигинде кулланатаган алатлары салынган выставка кирееклер. Байрамнынъ барысында «Волжский голос» деген ногай йырлар ярысынынъ енъуьвшилери савгаланаяклар, халк эм эстрада вокалы бойынша мастер-класслары эм гала-концерт уйгынланып оьтееклер. Байрамды уйгынлавшылары Астрахань областининъ халк маданиятынынъ илми-методикалык орталыгы, «Приволжский район» МО администрациясы, Астраханьдеги регионаллык ямагат организациясы «Эдиге» деген ногай маданиятынынъ орталыгы боладылар.
Шара Роспотребнадзор талаплавлары ман келисте уйгынланып оьтеек. Байрамда катнасувшылар шакырув билетлери бойынша катнаспага болаяклар.
