Оьткен курал айы ишинде оьзининъ тувган куьнинде ердесимиз, сав элимизге аты белгили ногай суьвретшиси Алибек Баймурат увылы Койлакаев Турция элининъ Адана каласында озгарылган конкурста 93 суьвретшилер сырасында ногай халкынынъ ваькили эсабында катнаскан. Коьп узамай, Стамбул каласында оьткен ювелирлер Симпозиумында ортакшылады.
Алибек Койлакаев – асылы ман Ногай шоьлиннен. Ол 1982-нши йылда район орталыгы – Терекли-Мектеб авылында тувган. Суьврет ясав ман ол бала шагыннан алып аьвлигип баслаган. Сонъ, ерли орта мектебин, Махачкала художестволык училищесин окып битирип, агаш устасы кесписин байырлап, Краснодар кала Художестволар академиясына окымага туьскен. Мунда ол «Графический дизайн», сонъ – «станковая графика» боьликлеринде окыган, китап графикасы эм иллюстрациясы дегенди де ийги билип уьлгирген.
А.Койлакаевтинъ куллыклары экспертлер мен йогары бааланган, а суьв- ретлер выставкалары коьп ерлерде, сонынъ ишинде Москва каласында, озгарылатаган эди. Сондайлардынъ бириси – Пятигорск каласындагы уьйкен выставка. Мунда озгарылатаган «Машук», «Домбай», «Каспий», «Кавказ ойынлары» деген шараларда Алибек оьз куллыклары ман саният бойынша тренер эсабында катнасатаган эди. Онынъ суьвретлеринде бас орында – тарих келбетлери. Суьвретшидинъ соьзлери мен, оьз произведениелерининъ персонажлары этип ол окыган китаплериннен алады, куллык этетаган жанрын ол «психологиялык темаларга сюрреализм» деп белгилейди. Ян тоьриндеги сезимлери, конъиллиги, анъсыздан тувган ой-токтаслары ногай суьвретшидинъ яратувшылыгында маьнели орынды бийледи. Ога бас орынында тек куры тарих илмиси тувыл, энъ маьнелиси – суьвретлев санияты аркасы ман келбетлерди, ян тоьрин керексинше коьрсетуьв.
– Меним мырадым – суьвретлер ясав оьнери мен пайдаланып, выставкалар озгарув эм яратувшылык аркасы ман дуныя акында хабарлав. Суьвретлеримнинъ бас тематикасы – тарих: эпос, баьтирлер, патшалар эм басшылар. Олар – оьзгерислер барысына себеплигин тийгисткен оьз заманларынынъ алдышы инсанлары, – дейди Алибек Койлакаев.
Оьзининъ яратувшылык аьрекетинде ол пайдаланаган затлар – кус канатыннан этилген суьврет ясав алаты (перо), кагыт эм бояк (тушь).
– Яратувшылык исимде оьзимди аквариумнан уьйкен тенъизге йиберилген балык кимик сеземен: яшав, ямагат, тарих туьрли туьслерге, оьзгерислерге, келбетлерге эм сюжетлерге толы, эм мен бу баьри затларды суьвретлерде коьрсетпеге суьемен. Ярасыклык дуныяды саклар, эм мен – согыс-урысларсыз дуныя эм кокыс-калдыкларсыз табиат уьшин! – дейди ногай суьвретшиси.
Бизим хабаршы.
Суьвретте: А.Койлакаев.