Коьп йыллардан бери язлыктынъ келуьви мен бирге Ногай шоьллигиндеги ана койлар сакланатаган отарларда кой козылав шагы басланатаган эди. Аьлиги заманда да район ериндеги хыйлы малшылар навруз айыннан алып янъы тоьл алув ислерине кириседилер.
Соьйтип, «сельсовет Арсланбековский» СП МО ерлеринде орынласкан «Тамерлан» деген аьел фермасынынъ етекшиси Рашид Биктемир улы Муслимовтынъ ана койлар отарында буьгуьнлерде кой козылав яваплы шагы тамамланып барады.
Биз онынъ малшылык бригадасына келетаган куьн козылардынъ коьбиси язлыктынъ йылувы ман коьгерип баслаган отлакларда аналары ман бирге багылып туры эдилер.
Рашид Муслимовка 2016-ншы йылда аьел фермери эсабында оькимет 5 миллион маьнеттинъ грантын тапшырган. Сол карыжлар аркасы ман ол мунда алдынгысы Ленин атындагы совхоздынъ кой котанында янъы мал беслевши кора салган, койлар кыс айларында сакланатаган кораларды ярастырган, койлар санын оьстирген эм сондай баска керекли ислерди яшавга шыгарган. Навруз айынынъ басыннан алып, Р.Муслимов коьмекшилери Арслан Шандиев, Солтан Отемишев, Амангельди Итупов пан бирге уьстимиздеги йылдынъ янъы тоьлин алып, соларды аман-эсен саклав кайгысын шегедилер. «Яс тоьл – малшылыктынъ негизи» дегенлер бурыннан бери атайларымыз.
– Кой козылав ислери осал ша юрмейди, сан ман айтканда, аьр 100 ана койдан 95 козы алып, саклап турмыз. Оьткен 2019-ншы йыл табиат аьллери ягыннан авыр кургаклы болып оьтти, ол зат янъы тоьлге оьз себебин этпей болмайды. Быйыл, айтпага, эгиз козылаган койлар йок. Былтыр биз аьр 100 ана койдан 100-ер козылар алган эдик. Койлардынъ коьбиси козылаганлар, эндиги 80 ана кой козыламага керек, – дейди Р.Муслимов.
Рашид оьзи асылы ман айтылган Червленные Буруны авылыннан. Ол куллыкшы аьелде тербияланып оьскен. Совет йылларында Ногай район АТПда, сонъында «ПМК-21» предприятиесинде водитель болып коьп йыллар ислеген. Оны ис йолдаслары да куллыгына яваплы, берген соьзине берк, ийги йолдас деп таныганлар. Ян косагы ман бирге эки аьвлетин асырап оьстирген.
Увылы Рамиль Муслимов аьлиги заманда Ногай РЭС начальниги, кызы Зульфира Джумаева район УСЗН коллективинде куллык этеди. Мундагы мал беслевши кораларга койлар куьзде салынады, язлыкта оларды солардан шыгарадылар. Сонъында олар орынына козыларды беслевге саладылар. Соьйтип бардырадылар койшылар аьр куьн сайын малшылыктынъ енъил болмаган куллыгын кайсы ава аьллеринде де.
Суьвретлерде: «Тамерлан» аьел фермасынынъ басшысы Рашид Муслимов; онынъ коьмекшиси Амангельди Итупов.
