Куьнтувар календарь бойынша келеяткан янъы йыл Коькшил (Кара) Сувлы Арслан белгиси астында оьтеек. Китай календари бойынша арслан йылы 2022-нши йылдынъ 1-нши февралинде басланаяк. Ол 2023-нши йылдынъ 21-нши январине дейим созылаяк. Аьдетке коьре, бизим элде сол заманга дейим каралмайды.

Гороскоп бойынша Янъы 2022-нши йылды уьйде энъ де ювык аьдемлер – аьел мен бирге йолыгув керек. Коьп дослар эм таныслар ман баска заман йолыгыспага болады. Эгер туьрли себеплерден янъыйыллык кешесинде энъ де ювык аьдемлер бирге йыйылып болмаса, яде сиз уьйден узак ерде болсанъыз, занъ согып, бир-биринъизди байрам ман кутламага мутпанъыз.
Янъыйыллык сыпыра келеяткан йылдынъ белгисине яраса, йыл уьстинликли оьтер дегенге коьп аьдемлер ынанадылар. Сонынъ уьшин коьп уьй бийкелери байрамга не аьзирлев, янъыйыллык кешесинде кайдай кийим кийип йолыкпага кереги мен эртеректен кызыксынадылар.
Арслан – эт суьетаган айван, сога коьре янъы- йыллык кешесинде сыпыранъызда эттен этилген аслар коьп болсын. Тавык, коькис, казы, баьпий эм кой этиннен азыклар аьзирленъиз, ама эсинъизде болсын: арслан сыйырды суьймейди, сонынъ уьшин тувар эт сыпыранъызга салманъыз. Солай ок балыктан этилген аслар ман да коьп аьвликпенъиз. Сыпыранъызда туьр- ли салатлар, ясылшалар, емислер, пыслак, козлар, суьтли азыклар болсын.
Газы болган ишимликлер сыпыранъызга салманъыз. Арсланга олар, солардынъ сырасында спиртли ишимликлер ярамас. Йыл белгиси сыпырада туьрли компотлар, елеклерден этилген морслар, соклар болганын суьер. Сол ишимликлер сары туьсли болса, тагы да яхшы.
Астрологлардынъ айтувы ман, Арслан ярасыкты бек суьеди, сога коьре сыпыранъызды ийги этип ярасыкланъыз.
Гороскоп бойынша Янъыйыллык кешесинде кыскаяклылар коьк, кара, куба, ясыл, куьмис туьсли кийим кийсе, яхшы, кызыл туьсти йыл белгиси суьймейди. Бир туьйир де былтыр, Сыйыр йылын йолыкканда кийген кийиминъизди кийменъиз.
Эр кисилер коьк яде куба туьсли костюм кийсе, йыл белгисине ярар. Астрологлар эри эм хатынынынъ кийими бир туьсли болса, ийги болар деген маслагатты бередилер.
Н.Кожаева аьзирлеген.