Халклар ара авыл хатын куьни белгиленди ___________________
Куьздинъ йылы, яйнаган куьнинде Ногай районында биринши кере Халклар ара авыл хатын куьни шатлыклы аьлде белгиленди. Бу куьнге багысланган байрам Гульзарадынъ конак уьйинде хатын-кызлар район советининъ председатели Асият Манкаевадынъ баславы эм уйгынлавы ман оьтти. Мунда хатынлардан социаллык куллыкшылар, почтальонлар, КФХ етекшилери, билимлендируьв, савлык саклав тармагында ислегенлер, полиция куллыкшылары, коьп балалы хатынлар эм баскалар шакырылдылар.
Бу куьн оларга коьнъилди коьтерген соьзлер, йоравлар айтылдылар, олардынъ исине де баа берилип, Сый грамоталар, разылыклар, гуьл байламлар, эстеликли савкатлар тапшырылдылар.
Биринши болып хатынларга оьз йоравларын «Ногайский район» МР администрациясынынъ аькимбасынынъ орынбасары Баймагомед Ярлыкапов айтты. Бас деп ол Асият Бадиевнага сосы байрамды районымызда биринши кере озгарганы уьшин уьйкен разылыгын билдирди, сонъ авыл хатынларынынъ авыр куллыгын белгилеп, олар уьйкен сыйга эм оьрметке тийисли экенин тагы да бир кере эске салды.
Оннан сонъ «Ногайский район» Депутатлар йыйынынынъ председатели Руслан Насыров хатынларды кутлады: «Хатын-ол ана, аьптей эм карындас. Аьлимлерди де, баьтирлерди де хатын тербиялайды. Биз, эр кисилер сизди суьемиз, аяймыз эм коршалаймыз».
Тагы да шатлык иелерине оьз йоравларын «село Терекли-Мектеб» СП МО аькимбасы Зейдулла Аджибайрамов айтты: «Биз бек суьйинемиз касымызда сондай ярасык, акыллы, эдаплы хатынлар болганына. «Эр кисиди эр этетаган кыскаяклы» деп айтылады. Кыскаяклыдынъ куьш салувы ман уьйкен куллыклар этилинеди, балалардынъ, яслардынъ тербиялавыннан тура, элимиздинъ келеектегиси уьшин сиздей кыскаяклылардынъ эткен иси аркалы баьримиз де рахатлы».
Буьгуьнги байрамды озгарувда коьтергишлеви эм спонсорлык ярдамын эткен «Ногайский район» МР администрациясынынъ аькимбасы Мухтарбий Аджековка, «Ногайский район» МР-нынъ Ямагат палатасынынъ председатели Эльмурза Саитовка, Авыл хозяйстволык управлениесининъ етекшиси Алибек Амановка, «село Терекли-Мектеб» СП МО администрациясына, ОАО «Россельхозбанктынъ» Терекли-Мектебтеги косымша офисине, Терекли-Мектебтеги почта боьлигине, «Ногайский район» МР-да КЦСОН боьлигине, ГКУ «Ногайское лесничество» етекшиси Феруза Дикиновага, авыл хозяйство асыллавынынъ ветераны Зарбике Аджиниязовага, Асият Койлакаевага, конак уьйдинъ иеси Гульзара Яриковага Асият Бадиевна оьз разылыгын билдирди. Ол шыгып соьйлегенде кыскаяклылар районымызда баьри тармакларда белсен аьрекет эм етекшилик этетаганын белгиледи.
Хатын-кызлар оьз ислерин сый ман эм намыслы толтыратаганын, олардынъ эткен куллыгынынъ маьнелиги акында айтты. Солай ок хатынларды «Айланай» фольклорэтнографиялык ансамблининъ етекшиси Мурат Ваисов, Ногай районы бойынша ОМВД байыр сырасы ман ислев бойынша куьп етекшиси Руслан Кельдасов кутладылар. Аьдетлер акында Авасхан Кульниязова, аьелде эм ямагатта хатыннынъ орыны акында Сталинат Заргишиева, яс несилди тербиялавда хатыннынъ маьнелиги акында Кезибан Алиева бек ийги хабарладылар.
Байрамнынъ ийгилигин ногай халкынынъ акыны Алибий Романовтынъ, йырлавшыларымыз Ариф Темировтынъ, Мурат Ваисовтынъ, Диана Сариевадынъ ортакшылык этуьви арттырды. А.Джанибеков атындагы мектеб окувшысы М.Садуева Р.Гамзатовтынъ анага багысланган ятлавын яттан айтты.
Шарады Гульфия Кокоева ман Бурлият Курманова усташа юриттилер. Авыл хатын-кызлар куьнине багысланган байрам коьпке дейим эсте саклангандай, коьнъил коьтерилис аьлде оьтти.
Н.Кожаева.
Суьвретте: савгалав мезгили.
