Наьсипли балалык – ол конъырав куьлкидинъ эм ярык коьнъилдинъ шагы. Россияда Балаларды коршалав халклар ара куьни язгы тыншаювдынъ биринши куьнинде белгиленеди. Сол куьнге багысланып савлай Элимиз бойынша спорт, кувандырув шаралары озгарыладылар. Буьгуьнги байрам Ногай районынынъ Карасу авылында коьплеген балаларды бирге йыйды. Шара уйгынлавшылары ман оларга кызыклы программа аьзирленген эди. Карасу авыл администрациясынынъ уйгынлавы ман онынъ меканы алдында авыл балаларына завыклы байрамы озды. Авыл аькимбасы Амирбек Каирбекович Арунов балаларды эм олардынъ аьвлетлерин Халклар ара балаларды коршалав куьни мен кутлады. Оьз кутлав соьзинде ол саьбийлер – авылдынъ байлыгы эм келеектегиси болатаганын, оьсип келеятырган несилдинъ акында каьр шегуьв – энъ бас борышлардынъ бириси экенин белгиледи. Ол окувшыларга ийги тыншаювды, янъы танысувларды, досларды, кызыклы ашылувларды, ойлаган мыратлары толганын йорады. Байрамга ярасыклыкты администрация аькимбасы ман шакырылган аниматорлар да костылар. Амирбек Арунов баьри балаларга да таьтли зияпетлерин эм мороженое пайлады. Балалар уьйкен кызыксынув ман юмаклар шештилер, суьйикли мультфильмлерден анъларын айттылар, йырлар йырладылар, туьрли конкурсларда катнастылар.
Соьйтип, шарады уйгынлавшылар коьмеги мен байрам конъыравлы эм наьсипли куьлкиге, завыклы ойынга, куванышка толып озды.
Г.Нурдинова.