Уллы Аталык согысынынъ 1418-нши куьни. Совет Союзынынъ Савытлы куьшлерининъ Оьр етекшиси Иосиф Сталин кыйыншы халкты Уллы Енъуьв байрамы ман кутлайды.
Онынъ 1945-нши йылдынъ 9-ншы май куьнинде айткан соьзиннен: «Совет Союзынынъ халкы немец-фашист баскыншыларына карсы юриткен Уллы Аталык согысы Енъуьв мен тамамланды. Германия толы кепте бузылды эм тизине шоькти. Бизим уллы халкка, енъуьвши-халкка данък!
Уллы данък баьтирлерге, яв ман куьресуьвде оьзлерининъ яс янларын курманлык эткенлерге, келеекте яшаяк халктынъ наьсипли яшавын туьзуьв уьстинде куьрескенлерге».
Сол ок куьн «Курляндия» армиясынынъ аьскер куьби Фриш-Нерунг еринде эм Куьнтувар Пруссияда Висла йылгасында явды кырган.
Чехословакия еринде биринши Украин фронтынынъ танк армиясы танъгы доьрт саьатте Прагага киреди. Сол куьн кешки вакытка Чехословакиядынъ бас каласы гитлершилерден босатылады.
Экинши куьн баьри Совет Союзынынъ фронтларынынъ аьскершилери «Орталык» немец-фашистлерининъ аьскерин курсавга алган.
Немец-фашистлердинъ эки аьскер куьби, капитуляция акында актты бузып, куьнбатар якка карап таядылар, совет аьскершилери оларды бузгышлавга йол аладылар. Эки куьн ишинде немец аьскерининъ коьлем кесеги бузгышланады эм есирге алынады.
СССР-дынъ Оьр Советининъ Президиумынынъ Указы ман «Прагады босатканы уьшин» деген медаль шыгарылады, сол белги мен 390 мынъ аьдем, сол санда 40 мынъ Чехословакия яшавшылары савгаланганлар.
1945-нши йылдынъ 9-ншы май куьнинде Балтийский флотынынъ Кызыл байраклы аьскерши куьби Борнхольм аралына туьсип, он эки мынълык яв гарнизонын курсавга алган эм берилмеге буйырык этилген.
Суьйинишли 1945-нши йылдынъ 9-ншы май куьни, Москва каласында. Савытлы куьшлерининъ Оьр етекшиси Иосиф Сталинге фашист Германиясынынъ капитуляциясы акында документ тапшырылады.
Кешки 10 саьатте Совет Союзынынъ бас каласы Москва Кызыл Армия аьскерлерине, Согыс-Тенъиз флотына оьз салютын береди.
Сол куьн бир мынъ топлардан отыз артиллериялык атув ман йиберилген салют тарихке кирди.
1945-нши йыл 9-ншы май куьни – Уллы Аталык согысы фашист Германиясын совет халкынынъ Енъуьви мен тамамланды.
Аьзирлеген
Г.Сагиндикова.