Бир аьелде оьскен балалардынъ байланысы айлак берк болады. Кашан да, бир курсактан шыккан аьвлетлер яшав бойынша оьзлери мен дайымларга ата-анасынынъ суьйимин, йылувлыгын алып барадылар. Олардынъ янлары да, эскеруьвлери де бир.
Биз аьелде бес кыз эм ялгыз увыл болып оьскенмиз. Ногайларда соьз бар: «Шоьлде ялгыз терек оьспесин, оьссе оьссин, солымасын, сынмасын, атаанада ялгыз увыл тувмасын, тувса тувсын, авырмасын, оьлмесин». Соьйтип, биз, аьптейлер, карындаслар, ялгыз аданасымыз Алавдинге тилек тилеп турамыз.
Ата-анамыздынъ ошагын соьндирмей, буьгуьнлерде ол аьлейи Брилиант пан бизге тирев болып турадылар.
Балалардынъ арасында мен энъ де кишкей. Кишкейлерге бала заманда бираз кыйынлы болады деп ойлайман, «аькел», «аькет» пен оьтеди балалык. Сонъында
уьйкенлер сенинъ акынъда каьр шегедилер, аявлайдылар. Мен де буьгуьнлерде оьзим ана болсам да, аьптелеримнинъ, ялгыз аданасымнынъ йылувлыгын излеймен.
Солай болады экен, бир аьелде оьскен аьдемлеринъе – сен кайзаманда да аьзиз эм ювык. Алавдин (авылшылар, таныслар аданасыма Алешка деп айтадылар) бала заманда аьптем Разиятты эм мени, анам иске кеткенде, карайтаган эди, бизи мен ойнайтаган эди. Ата-анамыз Шанев Язув увылы эм Маруся Солтан кызы бизге бир-биринъиз бен татым болынъыз, оьпкелетпенъиз деп айтатаган эди. Сол соьзлерди биз аьли де тутамыз. Оькинишке, буьгуьнлерде энъ де уьйкен аьптемиз арамыздан кешкен, болса да онынъ аьвлетлери, уныклары аьр дайым да бизим янымызда.
Тек туьнегуьнлерде аданасымыз Алавдин Шанев увылы Карагулов оьзининъ алпыс йыллык мерекесин карсы алды. Артка бурылып караганда, коьп те
тувыл, мен ялгызыма аьли де коьп йыллар йорайман, тек сол йыллардынъ ишинде ийгилик те, кыйынлык та болды. Соларды, Аллага шуькир, биз бирге боьлисемиз. Анамыздан эрте калдык, мен мектебте окыйтаган эдим.
Сол ашшы йойымды оьтпеге мага меним аьптелерим эм аданасым коьмек эттилер. Уьйкен разылыгымды мен ялгыз кешегим Брилиантка айтпага суьемен.
Ол мага анамдай болып калды, бир куьн де яман соьзи де, яман карасы да болмаган, мени уьйлиэшикли де эттилер. Буьгуьнлерде де ол – меним энъ де ювык аьдемим, сырымды да, сыбырымды да айтаман ога. Ол мени коьтергишлейди, дурыс этпеген заманым да болатагандыр, ол мага керекли маслагат берип, коьп
затларга уьйретеди. Буьгуьнлерде олар – меним энъ де ювык аьдемлерим. Увылы Камаладин оьзи аьел курып, келинимиз Камила ман эки увыл оьстирип
турадылар. Уныклары Фархат эм Ахмат – аданасым ман кешегиме энъ де уьйкен куьез. Атасы ман олар азбарда куллык этедилер, бав-бахшага да барадылар. Атасы оларды куллыксуьер, аьдемшилик, намыс, аьдиллик касиетлерди бас орынга салып яшамага керек деп уьйретеди.
Алавдин, оныншы классты Орта-Тоьбе авылынынъ мектебинде битирип, Первомайский зооветеринарный техникумга туьсти, ветеринар кесписин байырлады. Ветеринар болып Тула областининъ Арсеньевский районынынъ Большие Голубочки авылында ислеген. Коьплеген йыллардан бери сайлаган кесписине
алал болып, Бажиган еринде бас ветеринар врачы болып куллык этеди. Бир неше йыллар узагында «Ортатюбинский» авыл поселениесининъ аькимбасы болып
иследи. Алавдин – Дагестан Республикасынынъ ветеринар службасынынъ ат казанган куллыкшысы. Авыл еринде тувыпоьскен, Алавдин аданасым яшавын ер мен байланыстырды. Танъ ман турып, бав-бахша, эгин куллыкларын этетаганын неше кере де коьргенмен. Оьзим кырда болсам да, авылдан узак ерде яшайман, авылга келсем, оьз уьйим болса да, аданасымнынъ азбарына асыгаман. Мага коьре, меним алдыма ата-анам шыгып келеектей. Мен билемен, бу уьйде
мени аьр заманда да йылувлык пан кушагына алаяклар. Тек бир тилек тилеймен – ювык аьдемлерим аман-эсен турсынлар, бу уьйге тек яхшылыкка йыйналгандай куьнди берсин бизге Кудайым.
Биз, Алавдиннинъ аьптелери, карындаслары, аданасымыз бан оьктемсиймиз. Эм онынъ сыйлы мерекесинде баьри ийгиликлерди йораймыз.
Аданас – аьдемнинъ яшавында ювык эм аьзиз инсан. Каерде юрсем де, ол меним юрегимде, ойларымда, тилеклеримде. Атаанамнынъ соьзлери эсиме келеди: «Сизинъ канынъыз да, янынъыз да бир». Сол соьзлер кайбиримизге де оьсиет болады. Мен тагы да бир кере аявлы аданасымды тувган куьни мен кутлап, берк ден савлык эм узак оьмир йорайман.
А.Карагулова (Шувакова).
Суьвретте: А.Карагулов аьптелери эм карындасы ман.
