Аьдетке кирип, кырк йылдан артык заман, календарь бойынша, июнь айынынъ уьшинши каты
куьнинде, Россияда медицина куллыкшысынынъ кеспи байрамы белгиленеди. Бу куьн биз уьйкен
разылыгымыз бан медицина куллыкшыларынынъ аьрекетин белгилеймиз, оьзимиздинъ ийги соь-
злеримизди оларга багыслаймыз. Буьгуьн бизим баьри соьзимиз де медицина куллыкшыларына: коь-
плеген йыллар аьдем савлыгын саклав уьшин куьрес юриткенлер, тек янъыларда ис аьрекетин бас-лаганлар эм медицина куллыкшылар сырасын толтырарман деп, окув ошагына туьскенлер, сизге
уьйкен сый эм разылык. Колынъда яшав эм аьдем бактысы экенин анълав – сага уьйкен яваплык. Меним ойыма коьре, аьр кайсы медицина куллыкшысы да сол ойды басында саклайтаган-
дыр. Коьплеген медицина куллыкшылары оьзлерининъ ис борышларын тувра толтырувдан баска
болып, илми куллыклар ман да каьр шегедилер, етекшилев исти де юритедилер, бар араларында
саният пан да каьр шегуьвшилер. Халк арасында айтылатаган такпакка коьре, «талаплы инсан –
баьри ерде де талаплы».
Белгили орыс классиги М.Булгаков айткан: «Врачтынъ кеспи борышы – авырувлы аьдемге йылы карасын коьрсетуьв. Ол авырувлыга оьзининъ терен сезимлери мен карайды». Ол оьзининъ ис аьрекети бойынша аьдемнинъ кадирине коьре, авырувын белгилеп болган, бек сийрек те янъылысатаган болган.
Аьр кайсы медицина куллыкшысынынъ да тувра борышы – аьдем яшавын саклав, узайтув эм сапатын ийгилендируьв, соннан маьнели не зат бар. Соны коьплеген медицина куллыкшылары оьзлерине шакырув этип алып, кеспи аьрекетин бардырадылар. Сондай медицина куллыкшысы, Ногай орталык больницасынынъ етекшисининъ эмлев куллыгы бойынша орынбасары Зафира Эсманбет кызы Куруптурсунова. Врач кыскаяклыдынъ билдируьвине коьре, онынъ бардыратаган ис аьрекети енъиллерден тувыл, оьзек те, бирев де айтып болмайды, медицина куллыкшысынынъ иси тынышлардан деп. Кешеси-куьндизи мен сенинъ коьмегинъ керегеди авырувлы аьдемге. Ол тек сага сенеди эм «тилек» салынган коьзлери мен сага карайды. – Врач кесписин сайлавым босына тувыл эди. Бала шагымда оьзим коьп те авырыйтаган эдим. Тайпа-тамырымызда врач кесписин сайлаган аьдем мага дейим йок эди. Атам мал карайтаган доктор эди. Мен онынъ мал ман каьр шеккенин коьргенмен, ол кайтип уьйкен маьне берип малды эмлегени мага ярайтаган эди, оны коьрип, мен де соьйтип, аьдемлерди эмлемеге болаякпан ша деген ой мага да келди. Алдыда кеспи бойынша кыйынлыклар болмага болады яде болмайды деген ой келген деп те айтып болмайман. Сайладым тыныш болмаган врач кесписин, бу куьнлерде сол ис бойынша ислеп те турыман. Кыйын да болган, тыныш та болган, янъы тувган баладынъ йылавына суьйингенмен, кайгырган ерлер де болган, неге десе баладынъ яшавга
энуьви дайым тийисли аьлде оьтпейди. Акушер-гинеколог врачы кыйынлык пан анъсыздан йолык-
пага болады. Булай карасанъ, дени сав хатын ана болувга аьзирленеди, ама тийисли йорык бузылып,
анадынъ да, янъы туватаган баладынъ да яшав оьмири йинъишке йип ушында болып калады, – дейди Зафира Эсманбет кызы Куруптурсунова. Аьлиги заманда аягына берк турган, Ногай районымыз бой-
ынша юзлеген баладынъ яшавга энуьвин коьрген, соларды биринши болып колына алган Зафира
Эсманбет кызы онынъ ис аьрекетининъ басында насихатларын берген сулыплы врачлар Гульфира Исхак кызы Теминдаровага (яткан ери еннетли болсын), Кайтархан Оьтеген кызы Баймурзаевага, Аскер Рахмед увылы Арсла-новка оьз разылыгын билдиреди. – Олар мага коьп маслагатларын бергенлер, анъламаганды анълатканлар, оьзлерининъ сулыплары ман боьлискенлер, – дейди ол.
Аьлиги заманда Зафира Куруптурсунова оьзининъ разылыгын бу куьнлерде Ногай район Орталык больницасын етекшилейтаган Фаризат Янибек кызы Межитовага айтады.
– Халк айтувы акыйкат дегенге усап, «Театр илгиштен басланатаган болса», бизим эмлев поликлиникадынъ азбарына абытлаганлай басланады. Соны белгилемей болмайман, Ногай районы-
мыздынъ баьри яшавшылары да сога шайыт, кайдай ярасык болган поликлиникадынъ каралды-
сы, туьрли туьсли гуьллер коьзди кувантады, мунда эмлевде керексинип келген аьдемнинъ коьнъи-
ли коьтериледи, коьнъил тувыл ма яшав оьмирди узайтатаган да…
Сол ярасыклыкты тутув уьшин коьп кыйын салатаган ис йолдасларыма да уьйкен разылыгымды билдиремен. Алдымызда бизим кеспи байрам, сол байрам баьри медицина куллыкшыларына да тек ийгиликлер аькелсин, яшав оьмирлери ярасык эм наьсипке толы болсын, авырувлылар саны аз болсын, – деген йоравларын билдиреди Ногай Орталык больницасынынъ етекшисининъ
орынбасары З.Куруптурсунова. Медицина кесписин сайлаган аьдем, аьр кайсысы да, касиетине
коьре, бек йигерли болады, неге десе мунда тез карар алмага керек, яшав ман оьлим арасында турган
аьдемге ярдам этпеге. Соны тек эркли аьдем толтырып болады. Сога коьре де айтылгандыр, меди-
цина врачка да, авырувлы аьдемге де куват береди деп. Врач болув, меним ше, уьйкен наьсип, неге
десе сен аьдемлерге коьмек этуьвши. Соны ман сенде оьзинънинъ ийгилигинъди бир неше кере арт-
тырмага амалынъ да бар. Тек янъыларда Зафира Куруптурсуновадынъ ийги иси ДР
Аькимбасы С.Меликовтынъ атыннан Разылык хат пан да белгиленди.
Мен де Зафира Эсманбет кызы Куруптурсуновага, онынъ ис коллективине ак юрегимнен тек
ийгиликлерди, алдыга йигерли барувды, Ногай район яшавшыларынынъ савлыгын ийгиленди-
руьвге багысланган аьрекетининъ тек оьрге барганын йорайман.
Г.Сагиндикова,
РФ Журналистлер союзынынъ агзасы.
Суьвретте: З.Куруптурсунова.