Уьстимиздеги йылдынъ казан айынынъ ишинде Нефтекум районынынъ Коясыл авылыннан «Бирлик-Единство» волонтерлык куьби СВО юрген ерге 87-нши гуманитарлык югин Херсон еринде кызмет этетаган авыл яшавшысы, аьскерши ердесиннен йиберди. «Бирлик-Единство» волонтерлык куьбининъ юрек йылувлыгын салып аьзирлеген он ясырынув шилтерлерин эм керекли дарманларын йибердилер. Буьгуьнлерде аьскершилерге гуманитарлык ярдамын йыйнав эм йиберуьв – аьскершилеримизди коьтергишлевде, коьптен саклаган Енъуьвди ювыклатувга коьнъиллендируьвде энъ маьнели орынды тутады. Посылкалар ишиндеги аьр бир шилтер, керекли дарманлар, азык-туьлик – ол тийисли демевлик болып калмай, йигитлеримиздинъ яшавын да коршаламага, согыс борышларын толтырмага ярдамласатаган эм аьскерши яслардынъ ян-куватлыгын беркитип келетаган уьй мен янланган байланыс та болады. Янъыларда волонтерлар куьбинде конакта Ставрополь крайы бойынша муфтийининъ биринши орынбасары Файзурахман хаджи Эсенов болып кетти. Сыйлы конак келеекте ислемеге ийги йоравларын багыслап келуьви мен, савлай волонтерлык куьбине ян-коьнъил демевлигин косты. Сондай ян-коьнъил коьтергишлевин беруьв эм ийги йоравларын айтув «БирликЕдинство» волонтерлар куьбининъ ис аьрекетинде бек маьнели. Сол «Бирлик-Единство» куьп агзаларынынъ ярдамы аркалы коьплеген ислер яшавга шыгарылып келедилер. Волонтерлар бир де бос олтырмайдылар, ак ниетли ислерин белсенли бардырып, сувыклар туьскенше, аьскершилеримизди кайсы яктан да коршалав ниетте, кыс шагына янъы шилтерлерин аьзирлевде, сав куьшлерин салып келедилер. Аьлиги заман согыс урыслары аьллеринде согыс техникасын, позицияды коршалавда, явдынъ разведчик дронларыннан эм олардынъ авадан урувларыннан коршаланувда сол юрек йылувлыгы ман согылган шилтерлерининъ маьнеси бек уьйкен. Волонтерлык куьбининъ агзалары гуманитарлык ярдамын йыювда эм йиберуьвде белсенли катнасатаган, дайым коьтергишлев этип келетаган аьр кимге де уьйкен разылыгын билдиредилер. Олардынъ савлайын да бир асыл ниет бирлестиреди – коьптен сакланган Енъуьвди ювыклатув! Бирге биз – куьш! 

.Нурдинова. Суьвретте: волонтер куьби ис аьрекетте.