Россиядынъ Коршаланув министерствосы ман оьз ыхтыяры ман контракт туьзип, согыс спецоперациясы юритилип турган ерлерде патшалыгымыздынъ эркинлиги уьшин куьресте ортакшылык этуьвши яслар ман бирге 2022-нши йылдынъ куьзинде мобилизация бойынша кеткен гражданлар да катнасадылар. Олардынъ акында мен айырым кепте айтпага суьемен. Неге десе элимиздинъ Савытлы куьшлери сырасында согыс аьрекетинде катнасувга контракт туьзген яслар бу абытын оьз эрки мен, эртерек баьри затты да шегип-шелтеп, ишиннен бу затка аьзир болып алганлар. Мобилизацияга барувы акында военкоматтан анъсыздан повесткалар берилген ясларга ойламага эм шегип-шелтемеге заман болмаган: туьнегуьн повестка тапшырылган, буьгуьн сырада болмага керек. Кайтип айтылса да, психология ягыннан алып караганда, ол зат аьдем навасын бузбай болмайды да… Мине тап соьйтип Тарумов районынынъ АлександроНевское авыл яшавшысы Ислам Юсупов аьскер сырасында эр борышын толтырып келгенде, сол 2022-нши йылдынъ куьзинде ога эндиги СВО-га толы болмаган мобилизация бойынша повестка тапшырадылар. Йолга аьзирленмеге тек бир куьн берилди… 

Изображение

Ислам 2000-ншы йыл Дербент каласында тувган. Тек ол Аневское авылында оьзининъ анасы эм энеси мен бир уьйде яшап оьседи. Авыл мектебинде окып, мундагы 9 классты кутарады. Мектебтен сонъ ол банк исине окув уьшин Москва каласындагы бир колледжге туьседи. Ясы еткенде, оны Россия Савытлы куьшлер сырасына куллык этпеге шакырадылар. Аьскер сырасыннан кайтып тувган уьйине келеди. Болса да ога тувган уьйининъ ошак йылувы янында коьп олтырмага туьспеди, элде толы болмаган мобилизация басланды эм аьскершиди тагы да «труба йолга шакырды». Мобилизация бойынша шакыртылганларды, олардынъ сырасында Ислам Юсуповты да, Махачкаладан баслап Буйнакск каласына йибередилер. Сонда эки юма узагында согыс исине уьйретедилер эм тувра СВО ерине аькетедилер. Ислам сонда ок штурмовиклер отрядына туьсип калады. Согыста биринши болып алдыга разведчиклер кетедилер. Олар алды яктагы ер мен танысып эм душпан туратаган ерлер акында билдируьвлерин штурмовиклерге бередилер. Муннан сонъ баьри де авыр куллыкты штурмовиклер битиредилер, олар оьз коькиреклери мен биринши болып авыл яде калады явдан босатадылар. Ислам да аьр бир кала эм авыл уьшин йигитлерше согысады. Оьз йолдаслары ман бирге Донецк Республикасындагы Авдеевка калады явдан тартып алады. Сонда коьрсеткен эрлиги уьшин ол 2-нши дережели «Йигерлик уьшин» медали мен савгаланады. Бу ерде ол биринши кере яраланады. Аьскер госпиталинде эмленеди. Реабилитациядан сонъ тагы да СВО ерине, эндигиси Бахмут кала бетке карап йибериледи. Бу кала уьшин юритилген каты авыр согысларда аягына яраланады, сонда эмленеди. СВО еринде коьрсеткен ян берклиги, эрлиги, аьскер данъклыгы эм Тувган Элге алаллыгы уьшин Ислам Юсупов бу йол республикадынъ энъ де йогары савгаларынынъ бириси – «Дагестан халк баьтири» деген орден мен савгаланады. (Исламнынъ ата-анасы сол орденди айырым оьктемлик пен мага да коьрсеттилер). Уьшинши кере эм тагы да аягына ол эндигиси Работино деген калады укронацистлерден босатув уьшин юритилген согысларда яраланады. Тагы да госпиталь, эмленуьв, уьйине отпускка кайтув. Оннан сонъ эндиги де СВО-га. Бу йол И.Юсуповты Щебекино каласына, Волчанск бетке карап аькетедилер. Сонда оны артиллеристлерге йибередилер. Аьлиги заманларда ол СВО еринде алдынгы кебинде яяв аьскер сырасында, штурмовиклер боьлигинде Константинов якларда согыс аьрекетин бардырады. Ювыкта – СлавянскоКраматорский агломерациясы, ДНР еринде укронацистлердинъ ызгы беркитилген районларынынъ бириси. Мине соьйтип бирбирисининъ янларында янъы фашистлерге карсы, Донецк еринде оьз эрки мен контракт бойынша эм мобилизация бойынша согыска кеткен россия аьскершилери, бизим данъклы Армиядынъ баьри енъуьвлерининъ асабалыгын ызлавшы яслар, дав майданында Тувган Эли уьшин алдыга барадылар. 

М-А.Ханов. Суьвретлерде: Ислам Юсупов; онынъ йогары патшалык савгасы.