Дагестан Республикасында эм элимиздинъ туьрли муьйислеринде йыл сайын кырк кийик айынынъ 8-нши куьнинде Халклар ара «Ак турналар куьнлери» деп аталып, фестиваль озгарылады. Бу шара белгили дуныя, Россия эм Дагестан язувшысы, уллы Расул Гамзатовтынъ тувган куьнине багысланган. XXXIX Халклар ара Гамзатовский «Ак турналар куьнлери» фестиваль анъ байлыктынъ, согысувлар майданларда ян берген йигитлери акында мутылмас Эс эм таьвесилмес кайгыдынъ йыл сайынлык байрамы болады. Быйыл бу куьн Дагестан Республикасынынъ Аькимбасы Сергей Меликовтынъ Грантынынъ коьтергишлеви мен оьтеек.
1986-ншы йылда XX юзйыллыктынъ уллы шаири Расул Гамзатов баска ерде оьзине усаслы болмаган байрамды туьзген, буьгуьнлерде «Ак турналар куьнлери» савлай дуныяга белгили маданият оьзгерислер мен тенъ болып белгиленеди. Быйыл баьри шаралар да Аталыкты Коршалавшы йылына, Уллы Аталык согысында Енъуьвдинъ 80 йыллыгына, СВО баьтирлерине багысланаяк.
Программа бойынша коьп шаралар озгарылаяк. Тоьгерек стол «Енъуьвдинъ эм согыстынъ поэзиясы» Уллы Аталык согысында ян берген шаирлерге, шаирлерфронтовиклерге, СВО еринде катнаскан
язувшыларга багысланады. «Уллы Аталыктынъ турналары» кешлиги Расул Гамзатовтынъ патриотлык поэзиясына багысланып оьтеек, «Турналар» йыры Россия эм Дагестан Республикасынынъ халкларынынъ тиллеринде йырланаяк. Йыл сайын озгарылатаган «Поэтикалык балконыннан» согыс акында ятлавлар эситиленеек. Мунда адабият клубы «Журавлик», яс
шаирлер, фестивальдинъ конаклары катнасаяклар. Уллы Енъуьвдинъ 80 йыллыгына багысланып коьп шаралар озгарылаяк. Бу тема байрамнынъ конакларынынъ (олар – россия шаирлери, язувшылары, коьшируьвшилери, патшалык эм ямагат аьрекетшилери, СВО катнасувшылары) соьйлевлеринде кызыл сызык болып оьтеек, – деп хабарлайды болаяк фестиваль акында шаир, коьшируьвши, публицист, ДР Язувшылар союзынынъ правлениесининъ председатели, Россия Федерациясынынъ ат казанган маданият куллыкшысы, Дагестаннынъ Халк шаири Марина Ахмедова.
Расул Гамзатовтынъ аты савлай дуныяга белгили. Шаирдинъ «Турналар» деген ятлавы бу байрамнынъ байрамшылавына оьз себеплигин этти, ятлав давдан кайтпай калган йигитлерге багысланган.
Биринши кере «Ак турналар куьнлери» 1986-ншы йылдынъ сары тамбыз айында уллы шаирдинъ тувган еринде белгиленген. Сол йыл дагестан авылы Гунибте «Ак турналар» мемориаллык комплекси
ашылды. Сол эстелик Уллы Аталык согысына багысланган эстеликлерининъ турналар ман бириншиси эди. Бу байрамды йыл сайын шет эллерде де белгилейтаган болды. 2009-ншы йыл казан айынынъ 22-нши куьни ЮНЕСКО организациясынынъ халклар ара байрамларынынъ списогына киргизилди. Сол куьннен алып савлай дуныя бойынша бу куьн Макулласув эм ян берген аьскершилер акында йырдынъ байрамы деп озгарылады.
Мага коьре, каты канлы согыстан
Тувган ерге кайтпай калган йигитлер
Ярасыклы аккувларга айланган.
Бийийдилер коькте таза суьйимлер.
Ушадылар олар таза аспанда,
Кышкырысып, салам бизге савкатлар.
Мага коьре, биз де тынып каламыз,
Йогарыда мунълы бизим караслар.
Уллы Расул Гамзатовтынъ «Турналары» баьри тиллерде де окылады эм йырланады. Бизге, шаирлерге, кырк кийик айынынъ басында оьткерилетаган байрам бек маьнели эм керекли. Йыл сайын, амал тавып, бу куьнлерде биз баска язувшылар ман бирге данъклы ердесимизге, бизим
тынышлыгымыз уьшин ян берген йигитлерге сый этемиз эм олардынъ акында басымызды да, тизимизди де иемиз.
Гульфира Бекмуратова.
Суьвретте: М.Ахмедова, ДР Язувшылар союзынынъ правлениесининъ председатели.
