ДР бойынша Ногай районындагы Социаллык фонды муниципалитте яшаган эслилерге эс этедилер, оларды тувган куьнлери мен, байрамлар ман кутлайдылар. Янъыларда Социаллык фондынынъ етекшиси Мадина Абдулалимова Терекли-Мектеб авылынынъ эсли яшавшысы Виль Яхиевич Сулеймановты 90 йыллык мерекеси мен кутлап, Сый грамота эм савкат тапшырды, узак оьмирди, ден савлыкты, онынъ аьр бир куьни куваныш, йылувлык аькелгенин, ювык аьдемлердинъ сыйына,
эс этуьвине, каьр шегуьвине, наьсипке эм онъайлыкка толы болганын йорады. Элбетте, бу куьн онынъ тоьгерегиндеги ян-йолдасы, кардаш-ювыклары, дослары, авылдаслары, балалары эм уныклары, онынъ йогары коьнъили бизге коьп затты айтты. Бу аьелдинъ азбарына киргенлей ок, бир аьлемет йылувлык, анъ-эдаплык, берекетлик, куллыксуьерлик сезилди.
Виль Сулейманов узак Ульяновск областинде тувган. Ногай районга Виль Яхиевич 1955-нши йылдынъ караша айынынъ 4-нши куьнинде келген. Сол заман Терекли-Мектеб авылында орынласкан аьскер боьлиги янъы ашылаяткан болган. Аьскерден сонъ Ульяновск областинде тувган
яс Ногай районында ислеп калады. Яс мунда курувшы болады, ол павильонлар, район орталыгындагы Маданият уьйининъ курылысында катнасканын бизге хабарлайды. Сонъ коьп йыллар совхозда курувшы, агаш-устасы болып ислейди. Бир ийги куьн ярасык кыз Беризат пан танысып, 1970-ншы йыл оны ман аьел курады. Мине татымлыкта эм тил бирликте экеви 54 йылдан
бери яшайдылар. Оларды авылдаслары орамымыздынъ сыйлы ясуьйкенлери, авылымыздынъ коьримли деген аьели деп сыйлайдылар. Виль ман Беризат Сулеймановлар увылы эм кызынынъ
балаларына, солай ок немерелерининъ куьезине суьйинедилер.
Бизим хабаршы.
Суьвретте: В.Сулеймановты кутлаган мезгил.