Бизим ата-бабалар бир затты да билмей айтпаганлар, кайсы ногай такпагын окысанъ яде эситсенъ, онынъ терен ойын эм акыйкатлыгын анълайсынъ. «Анасын коьр
де – кызын ал, аягын коьр де – асын иш» деп те бурынгылар босына айтпаган. Сол
такпактынъ тувралыгына эм аьвелгилердинъ каьмбиллигине, ис йолдасым Лиза Сейдахмет кызы Бекмурзаева бизи мен оьзининъ балалыгы ман байланыслы эскеруьвлери мен боьлисип, анасынынъ акында хабарлаган шакларда, мен кайта-кайта шайыт боламан. Ол оьз анасыннан бир куллыктан а коркпай, кыйынлыклардан иркпей эм шыдамлыкты бас орынга салып уьйренген. Сол касиетлер ога яшавдагы сынавлардан оьтпеге, куванышларга суьйинип билмеге коьмек эткен болар деп ойлайман.
Лиза Сейдахмет кызы Кумлы авылында тувып-оьскен. Аьелде тунгыш бала болганга, ол оьзининъ эки синълисине эм ялгыз аданасына керек болган заманларда маслагатын, ясуьйкен соьзин айткан. Тувган аьелинде болган синълилери эм аданасы арасындагы татымлыкка эм бир-бирине табылув, тирев болувга кыскаяклы заман етип, шагы келгенде, оьз балаларын да уьйреткен. Балалык пан аманластырган мектеб йыллары оьткен сонъ, кызалак йорык Кумлы авылында байланыс боьлигининъ етекшиси орынында ислеп баслайды. Сонъ оны район узел связи начальниги Шора Аджибаев В.Петров атындагы Ставрополь байланыс электротехникумына окымага йибереди. 1986-ншы – техникумды окып тамамлаган йыл, ТереклиМектеб почта-телеграф байланысында оператор куллыгын юритеди. Сонъ ол ЧервленныеБуруны авылындагы почта байланысында ислеп баслайды. Сол йылларды да ис йолдасымыз бек етимисли эм кызыклы деп эсине алады. Мунда яс кыздынъ исине яваплылыгын, кайсы затка да уьйкен эс этуьвин куллык эткен биринши куьнлериннен алып белгилегенлер. Ол берилген планды артык-артыгы ман толтырган. Бу куьнлерге дейим Лиза Сейдахмет кызы сол йыллардагы тамада оператор Зухра Сабутовады уьйкен сый эм разылык пан
эсине алады. 1997-нши йыл Лиза Сейдахмет кызы «Шоьл тавысы» республикалык газетасынынъ редакциясында ислеп баслайды. Баслап кыскаяклы коьшируьвши болып аьрекетлейди. Сонъ ол корреспондентлер язган статьяларды компьютерге коьширеди, оннан сонъ верстальщик куллыгын толтырады. Бу куьнлерде Лиза Бекмурзаева редакцияда дизайнер исин юритеди, ол газетада суьвретлер ашык, ярасык болып шыксын деп, оьзине белгили болган сырларды кулланады, журналистлер язган макалалардан аьзирленген макетлар бойынша уста коллары ман компьютерде газетады ясайды. Лиза Сейдахмет кызы Дагестан Республикасында ана тилинде баспаланган
сынъар газетасынынъ дуныя ярыгына шыгувга оьз уьлисин косып келгенли 28 йыл да озып
барады. Йыллар анъсыздан кеткендей болады, ама сол заман ишинде сулып та келеди, аьдемнинъ коьп затка карасы да туьрленеди. Лиза Бекмурзаевадынъ ийги иси ДР Баспа министерствосынынъ эм Терекли-Мектеб авыл администрациясынынъ Сый грамоталары ман белгиленген. Ол – ДР Журналистлер союзынынъ агзасы.
Ис йолдасымыздынъ аьели акында айтпасак, соьзимиз толы болмас. Ол Ленин авылында оьскен Иса Бекмурзаев пен аьел курганлы отыз йылдан артады. Оьзек те, сол йыллар ишинде кыйын да, тыныш та болды, яшав деген бир тегис оьтпейди, бу куьнлерде болса кыскаяклы – сыйлы ана, кайын ана, тандыр саклавшы, уныклары Сафия ман Алиханнынъ суьйикли тетеси. Ян йолдасы Иса ман бирге
олар уьш йигит тербиялаганлар, аьр бирисине билим берип, яшав йолына да салганлар.
Бу куьнлерде ата-анасы олардынъ татым аьеллер курып, ислерин яваплы толтырып турганга, эдаплы эр-йигитлер болып оьскенине куванып, рахатланып карайдылар. Уьйкен увыллары Алавдин Саратов каласындагы «Реавиз» медицина университетинде окыган, бу куьнлерде стоматолог-ортопед болып ислейди, келини Гульжана – врач-эндокринолог. Адлан оьз хатыны Джамиля ман Сургут каласында яшайды эм сондагы лабораторияда техник куллыгын юритеди. Кишкейи Султан Ногай районы бойынша Россия ОМВД-сында куллык этеди, онынъ хатыны Диана бизи мен бирге редакцияда ислеген заманлар да болады.
Бу куьнлерде Лиза Бекмурзаева Алласынан ер юзинде эмишлик болсын деп, оьзининъ балаларына, ювыкларына, халкына савлык тилеп яшайды. Балаларына эм уныкларына суьйинип, куьезленип турады.
Нурият Кожаева.
Суьвретте: Лиза Бекмурзаева.
