Йылсайынлык август айындагы окытувшылар конференциясы – билимлендируьв тармагындагы, Янъы окув йылына мырадларды эм борышларды белгилеген маьнели оьзгерис. Бу йыл да сол маьнели шарага Халк яратувшылык орталыгында билимлендируьв учреждениелер етекшилери, педагогикалык исининъ ветеранлары, тербиялавшылар, сулыплы насихатшылар эм яс окытувшылар
йыйылдылар.

Конференция катнасувшыларын биринши болып Ногай район аькимбасы Джамалутдин Эсиргепов хошлады. Ол бизим ортак миллет борышымыз ясларды патриотлык яктан тербиялав экенин белгиледи. Солай ок район етекшиси окытувшылардынъ кеспи усталыгын оьстирмеге ийги аьллер туьзбеге керегин айтып, кеспи усталык эм яваплылык аркалы биз алдымызга салган баьри мыратларды эм борышларды толтырмага куьш табаягымызга сеним этти. Сонъ Джамалутдин Эсиргепов ногай тилинде баьри йыйылганларга ана тилин сакламага шакырув этти.

Билимлендируьв боьлик етекшиси Амирхан Межитов «Ногай районында билимлендируьвдинъ
маьселелери эм абырайы» деген темага доклады ман шыкты. Ол муниципалитеттинъ билимлендируьв тармагындагы оьрленуьв планлары, етимислери, проектлердинъ яшавга шыгарылувы, оькимет сынавлардынъ сырагылары, республикалык эм савлайроссиялык олимпиадалардынъ савгашысы болган окувшылар акында айтты. «Психолого-педагогикалык
классы проектин яшавга шыгарув» деген темага доклады ман А-Х. Джанибеков атындагы мектебининъ етекшиси Курасхан Ярикбаева шыкты. Физико-математикалык класслар проектининъ яшавга шыгарылувы акында Нариман авыл мектебининъ етекшиси Байрамбике Тенгизова хабарлады. «Айсылув» балалар бавынынъ психологы, «Впитатель года России –2025» Савлайроссиялык кеспи конкурсынынъ савгашысы Эльвира Манкаева «Баладынъ физический эм психический ден савлыгы» деген тема бойынша оьз маслагатларын этти. Кабыл этилинген резолюцияды А-Х.Джанибеков атындагы мектебининъ окытувшысы Лейла Сагиндикова окыды. «Движение первых» ерли боьлигининъ председатели Айнара Акмурзаева боьлик исининъ акында хабарлады. Окытувшыларды Янъы окув йылынынъ басланувы ман СВО катнасувшысы, офицер Роман Бабаев, билимлендируьв куллыкшылар профсоюзынынъ район комитетининъ председатели Арслан Бакиев кутладылар. Шарадынъ экинши кезегинде Ногай район етекшиси Джамалутдин Эсиргепов, онынъ орынбасары Мурат Шадиев йогары кеспи усталыгы, сайлаган исине алаллыгы эм оьсип келеяткан несилди тербиялавда эм оьрлендируьвде уьйкен уьлис косканлары уьшин
окытувшыларга ДР Билимлендируьв министерствосыннан, район администрациясыннан Сый грамоталар, солай ок коькирек белгилер тапшырдылар.
Нурият Кожаева.