Спорт – куьш-карувды беркитеди, яс аьдемнинъ савлыгын кеплейди, заманга коьре, спорт пан каьрлеген аьдем сыйлы да болып саналады…
Ызгы заманларда соны ман каьр шеккенлер саны коьбее береди, элбетте, оларды тербиялайтаган кеспили тренерлер саны да оьседи, олар да бир заманларда куьш, кыйын салып, атак казанган спортсменлерден боладылар.
Аьр кайсы тренер де оьз исининъ тамамын коьрмеге суьеди, тербияланувшылары алды орынларга етиссе, олар ман бирге суьйинедилер, тагы да уьстинликлерге етисуьв уьшин ис аьрекетлерин бардырадылар. Айтып озайык, аьр кайсы тренер мен соьйлесенъ де, эгер олар оьзлери тербиялайтаган йигитлеринде талабын, алдыга ымтылысын коьрсе, сога куьшин салады, оны йогары уьстинликке еткермеге, Россия кезегиндеги спорт аренасына шыгармага шалысады. Тек тренердинъ талабыннан пайда болмайды, эгер спортсмен оьзи коьп кыйын салмаса.
Бу куьнлерде талаплы спортсменлер саны аз тувыл, олар туьрли ерлерде озгарылатаган спорт сынасларга барадылар, ийги атак
та казанадылар. Тек янъыларда КарашайШеркеш Республикасынынъ Красный Восток авылында, ФСБ генерал-майоры Индранил Какупшевтинъ эстелигине багысланган спорт турнири болып озды. Бу йол сол турнир спорттынъ бокс кебине багысланган эди. Дагестан Республикасынынъ Ногай районыннан ортакшылык эткен спортсменлер бес савгалы орынларга тийисли болып, биринши орынлардынъ иелери болып кайттылар.
Сол алдышы орынга тийисли болган йигитлер баьриси де тренер Динислам Исмаилов етекшилейтаган Ногай районынынъ бокс клубынынъ тербияланувшылары боладылар.
Тренердинъ билдируьвине коьре, бу турнирде уьш юзден артык саны болган боксерлар ортакшылык эткенлер, яслар туьрли регионлардан келген эди, баьриси де ийги аьзирленгенлер деп айтпага болады.
– Дагестан Республикасынынъ Ногай районыннан 15 спортсмен аькеттик. Мен сол тамамлар ман разы деп айтпага боламан. Оьзек те, аьли де аьзирлик керек, етискен уьстинликлерде токтамага ярамайды. Мен оьзим тербиялайтаган боксерларга бек сенемен. Олар аьли де ийги ойынлар коьрсетерлер, енъуьвлер де коьп болар. Бу турнирде биринши орынларды Нурлан Аблезов, Фарух Хурсанов, Карим Машавов, Нурлан Адисов, Амин Шураев, Григорий Комельников эм Али Бийбулатов алдылар. Мен оларды сондай уьстинлиги мен кутлайман, – дейди Динислам Исмаилов.
Ясларымыз уьстинликлерге етиссе, суьйинемиз олар ман бирге. Аьр кайсы кыйыннынъ да тынышы болады. Кайсы тармакта да ислеген аьдем, ислесе, уьстинликке етиседи. Мен де алдыда балаларга тек енъуьвлерди, кайсы катнаскан турнирде де тек савгалы орынга тийисли болганды йорайман.
Галима Курганова.
Суьвретте: енъуьвши яслар.
