Ызгы занъ – аьр бир окувшыдынъ яшавында маьнели эм янга якын байрамларынынъ бириси, ол мектеб йылларынынъ тамамланувын эм яшавдынъ янъы кезеги басланувын белгилейди.  А-Х.Джанибеков атындагы мектебининъ выпускниклерине 9 эм 11 йыл окувы да таьвесилди. Тек туьнегуьндей болады олар, йигерсизленип эм юреклери телезип, биринши кере билимлер дуныясынынъ капысын ашканлы, а буьгуьн болса, олар – йигерли, талаплы, оьз куьшлерине сенген выпускниклер. Экинши уьйлери болган аявлы мектеб пен
аманласпага заман да келди. Мунда болган коьп куванышлар, енъуьвлер, арада янъылыслар эм тынышсызланувлар. Буьгуьн болса аьр биревдинъ эсинде дайымларга сакланган, янъы кенъ йолды баслаган ызгы занъ шалынады.
Курал айынынъ йылы эртенълигинде А-Х.Джанибеков атындагы мектебинде янъы мыратларга толган выпускниклер эм оьз ислерининъ сырагыларына куьезленген окытувшылар суьйинишли эм мунълы аьлде мектеб йылларындагы оьзгерислерди эске алдылар, разылык соьзлер айттылар эм насихатларын бердилер. Аьдет бойынша
биринши болып выпускниклерди мектеб етекшиси Курасхан Ярикбаева кутлап, юрегиндеги йылы йоравларын айтты, оларды коьп янъы амаллар, етимислер куьтетаганын белгиледи. Байрам линейкасында ортакшылаган Ногай район аькимбасы Джамалутдин Эсиргепов оьз соьзин шатлык иелери–выпускниклер мен бирге оьсип келеяткан
несилди тербиялавга уьйкен уьлис косатаган окытувшыларга эм балаларын дайым да колтыклаган, олар ман бирге куванган эм олар уьшин янлары авырыган ата-аналарга каратты.
Ол выпускниклерге алдыдагы экзаменлерге эм яшав йолын сайлавга яваплылы карамага, билимлерге эм оьрленуьвге ымтылмага шакырды. Район етекшиси олар кайда болсалар да, бир де киши тувган ерин мутпасын деген маслагатын берип, Ногай районга талаплы, билимли яслар керекли экенин айтты.
Танъ эм каьмбил соьзлерин бу куьн шатлык иелерине мектеб етекшисининъ тербиялав иси бойынша орынбасары Эльмира Суюндикова, окытувшылар
Адильхан Койбаков, Адильбек Валиев, Эльмира Аметова, Залина Суюнова эм ДР ат казанган артисти Альмира Тунгатарова караттылар. Ата-аналар атыннан Аминат Шокаева, выпускниклер атыннан Ислам Мусаев шыгып соьйледилер. Бу куьн йылы йоравлар айтылып калмай, туьрли баргылар – Сый грамоталар эм разылыклар да тапшырылды. Баьри йыйылганлар Савлайроссиялык, республикалык конкурслар енъуьвшилерине эм баргышыларына, спортта уьстинликлерге етискенлерге уьйкен оьктемлик пен карадылар.
А-Х.Джанибеков атындагы мектебиннен бу куьн коьп билимли, йигерли эм талаплы яслар йол аладылар. Мине выпускниклер мектеб вальс биювинде ярасыклы айланадылар, аьр кимди оьз ойлары, мыратлары бийлейди. Эндиги байрамнынъ оьзеги – ызгы занъ шалынув шагы да етти. Оны бермеге сыйлы ыхтыяр 11-нши класс окувшысы Алтынай
Хозбулатова эм 1-нши класс окувшысы, шахматлар бойынша Дагестан чемпионы Альберт Елакаевке берилди.
Ызгы занънынъ занъыраган сеси янъы енъуьвлердинъ басы болсын, алдынъызда кенъ эм ярык йол ашылсын, аьр бир окувшы оьзининъ келеектегисине карап йигерли абытласын! Яхшы йол, аявлы выпускниклер!
Нурият Кожаева.
Суьвретте: А-Х.Джанибеков атындагы мектебинде ызгы занъ байрамы.
(Б.Борановадынъ суьврети).