Дагестан Республикасынынъ Баспа эм информационлык Агенствосынынъ етекшиси Арсен Юсупов Россия Госдумасынынъ депутаты Нурбаганд Нурбагандов пан йолыгысты.
Дагинформ басшысы парламентарийге 2025-нши йылда Дагестан коьлем информационлык тармагында болган янъылыклары – медиахолдинглер туьзилгени акында хабарлады. Арсен Юсуповтынъ айтувы ман, редакциялар керек тувыл функцияларыннан босатылдылар, соны ман бирге яратувшылык контентининъ сапаты оьсти, янъы ойлар, проектлер яшавга шыгарувга амаллар табылды. Сол проектлердинъ коьбиси РФ Президенти Владимир Путин мен беркитилген Россия халкларынынъ бирлик йылы ман байланыслы. Соны ман байланыста, Агенстводынъ етекшисининъ айтувына коьре, айырым
маьне республикамыздынъ тамырлы халкларынынъ тилинде шыгатаган шыгармаларына бериледи.
Нурбаганд Нурбагандовтынъ белгилеви мен, Дагестан коьплеген халклардынъ дослыгы ман, бир-бирисине сый этуьви мен, мынълаган йыллар бирге татымлыкта яшавы ман Россия халкларынынъ бирлик йылы барысында коьримли уьлги болады.
– Буьгуьнлерде де, 80 йылдынъ артындагындай болып, бизим ердеслеримиз баска халклар ман бирге Аталыкты саклавда оьзлерин йигитлерше коьрсетедилер. Биз олардынъ баьтирликлери мен оьктемсиймиз, – деп айтты ол.
Йолыгыста Арсен Юсупов депутатка «Енъуьв энциклопедиясын» коьрсетти. Бу шыгарма 15 китаптен туьзилген, ол баска миллеттинъ ваькиллери мен бирге Афганистан еринде согыскан ердеслеримизге, контртеррорист операцияларында катнасып, йогары патшалык баргылар алган республика яшавшыларына, согыс спецоперациясынынъ катнасувшыларына багысланган.
– Бу энциклопедиядынъ баспаланувын Дагестан Республикасынынъ Аькимбасы Сергей Алимович Меликов толысынша коьтергишледи, – деди А.Юсупов.