Йыл сайын 1-нши сентябрь куьнинде элимиздеги баьри авыл-калаларда мек теб ке дейимги, баслангыш, орта эм йогары билимлендируьв учреждениелери нинъ капылары ашылып, балалардынъ эм яс-явкадынъ кувнак сеслери мен дуныяга Билимлер куьни келгенин шайытлайды. Басланып турган 2026-2027-нши янъы окув йылы алдында Ногай районынынъ билимлендируьв учреждениелерининъ сога кайтип аьзирленгени акында район Билимлендируьв боьлигининъ начальниги Амирхан межитовтынъ билдируьвин беремиз. 

Билимлендируьв тармагын янъы басланып турган окув йылына аьзирлев – ол бизим куллыгымыздынъ маьнели деген кезеги эм соны ман окытувдынъ сапаты эм балалардынъ кавыфсызлыгы байланыслы. Ногай район администрациясынынъ беркитилген шаралар планы ман келисли аьлде, быйылдынъ май айыннан август айы узагында баьри муниципаллык объектлерин комплексли кабыл этуьв ислери оьткерилген. Янъы басланып турган окув йылында район еринде 16 ортакбилимлендируьв организациялары оьз аьрекетин юритееклер, соларда баьриси 3500 окувшылар билим алаяклар. Мектебке дейимги 11 организацияларында 1141 бала тербияланаяк. Соны ман бирге район бойынша 2 косымша билимлендируьв учреждениелеринде 735 окувшы янъы окув йылын баслаяк. Баьриси район мектеблеринде биринши кере парталарга 274 бала олтыраяк. Янъы окув йылынынъ басланувына баьри де билимлендируьв учреждениелеринде окув кабинетлерин, саьнелерди, спорт залларды, асханаларды эм медициналык блокларын ярастырув ислери тамамланган демеге керек. Меканлар куьз-кыс заман кесегине толысынша аьзирленгенлер. Быйыл 2-нши номерли балалар-яслар спорт школасында «Авыл ерлерининъ аьлиги замандагы коьрки» деп аталган федераллык проектининъ эсабында капиталлык ярастырув ислери юритиледи. Бу куллыклар быйылдынъ 30-ншы октябрине кутылмага караладылар. Терекли-Мектеб авылынынъ «Юлдыз» эм «Айсылув» балалар бавларында «Авыл ерлерининъ комплексли оьрленуьви» деген патшалык программасы бойынша капиталлык ярастырув ислери ызына еткенлер. Аьлиги заманда буларда видеотергев эм автоматикалык пожарный сигнализация тармакларын да курув куллыкларына келисуьвлерге кол басылганлар. Ортак билимлендируьв учреждениелеринде быйылгы окув йылын 448 педагоглар баслайдылар, олардынъ 145 – йогары категориялы, 81– биринши категориялы окытувшылар. Солай ок мектебке дейимги учреждениелеринде болса 112 педагоглар ман 85 тербиялавшылар Билимлер куьнин карсы аладылар. Окытувшылардынъ квалификациясы быйылгы ЕГЭ сырагылары ман беркитилген, сол сынавлар уйгынлав яктан етиспевликлер йоклыгын коьрсеткенлер. Выпускной классларынынъ окытувшылары патшалык тамамлав аттестациясына аьзирленуьв бойынша квалификацияды арттырув курсларын оьткенлер. Билимлендируьв тармагына яс специалистлер де иске алынадылар, олардынъ аьр бирисине йогары категориялы насихатшы беркитилген. РФ Ярыкландырув министерствосынынъ тербиялав куллыгы бойынша ис планын толтырувга айырым эс бериледи: 6 билимлендируьв учреждениелеринде тербиялав иси бойынша директорлардынъ маслагатшыларынынъ ис орынлары киргистилгенлер. Тестирование кебинде, эгер федераллык бюджетиннен айырым штатлар берилгендей болса, тербиялав иси бойынша маслагатшылар ис орынлардынъ вакансияларын толыстырув уьшин 9 педагоглар тийисли косымша окувларды оьткенлер. Баьри билимлендируьв учреждениелеринде де террорист исиннен коршаланув аьллери тергелген. Аьр бир мектебте эм балалар бавында автоматлы пожарный сигнализациясы, билдируьв тармаклары, авара салатаган байланыс кнопкалары иске яравлы аьлинде. Солай ок соларда эвакуацияга, спецтехникага янасувга йоллар ашык, от соьндируьвши алатлары аьзир этилингенлер. «Оьсуьв точкасы» орталыкларында компьютер техникасы янъыртылган. Окытувшылардынъ баьри ис орынларына да тезлик интернет байланысы тартылган. Район ериндеги баьри де мектеблерде баслангыш классларынынъ окувшылары уьшин исси ас аьзирлев эм беруьв уйгынланган. Исси ас пан район еринде 1353 бала канагатланаяк. Асханалардынъ аьллери иске яравлы аьлинде, федераллык эм республикалык субсидиялар аркасы ман иркуьвсиз карыжлав юритиледи. Соны ман бирге ортак ийги ис юрисине карамастан, эс беруьвди талаплайтаган бир неше маьселелер де орын табадылар. Айтпага, бир неше мектебке дейимги билимлендируьв учреждениелеринде юмсак инвентарь (ястыклар, матраслар, яювлар) сатып алув, балалар кроватьлерин эм савытларын янъыртув керегеди.