Янъыларда Ногай район администрациясында спортта уьйкен уьстинликлерге етискен яс спортсменлер оьрметлендилер. Сол куьн йолыгыска район администрация
ваькиллери, спорт бойынша тренерлер, солай болып муниципалитетте яшаган Россиядынъ эм Дагестаннынъ яс чемпионлары йыйылдылар.
Шарады «Яслык» яслар орталыгынынъ етекшиси Абибулла Шамбилов ашты. Ол шатлык иелерин кутлап, оларга аьли де уьйкен енъуьвлер йорады. Абибулла Шамбиловтынъ соьзлери мен, савлай Россиядагындай болып, бизим районда да спорт пан каьр шекпеге онъайлы аьллер туьзиледи: футбол стадионы курылган, киши футбол стадионы курылаяк, бу йыл спорт школада ярастырув куллыклар юритилеек, келеекте янъы спорт школасы салынаяк.
Оннан сонъ яс спортсменлерге каратылган маслагат соьзлерин «Ногайский район» МР Депутатлар Йыйынынынъ председатели Алибек
Менласанов айтты: «Ызгы 5-10 йыл ишинде бизим ногай яслар спорт бойынша уьйкен уьстинликлер коьрсетип келедилер. Уьйкен оьктемликке, ясларымыз сырасында Дагестан, Россия, соны ман Дуныя чемпионлары да бар. Оьз алдынъызга аьли де уьйкен мыратлар салынъыз эм соларга етисуьв уьшин куьшинъизди аяманъыз! Баьри йоллар сизинъ алдынъызда ашык, бизим яктан сизге дайым да коьтергишлев болар!
Сизге тек районымыздынъ онъайлыгы уьшин келеекте аьрекет этер эм сыйлы кеспилерди байырлар уьшин ийги окымага эм ден савлыкты беркитпеге спорт пан каьр шекпеге керек болады».
Бу куьн Алибек Менласанов спорт бойынша уьйкен уьстинликлерге етискен ясларымызга Сый грамоталар эм савкатлар тапшырды. Олардынъ сырасында ММА бойынша эки кайта дуныя чемпионы, эркин куьрес бойынша Дагестан чемпионы, тайский бокс бойынша Дагестан чемпионы, ММА бойынша Россия чемпионы, Сырт Кавказ федераллык округы бойынша «боевое самбо» спорт кебининъ чемпионы, грэпплинг бойынша халклар ара турнирининъ енъуьвшиси Юсуф Шангереев,
бокс бойынша Дагестан чемпионы
Али Бийболатов, тайский бокс бойынша Дагестаннынъ эм Сырт Кавказ федераллык округынынъ чемпионы Муратбек Зарманбетов, эркин куьрес бойынша Ставрополь каласындагы ашык турнирининъ чемпионы, Дагестан зональный бириншилигининъ чемпионы Билал Менласанов, шахматлар бойынша Дагестан чемпионы Айшат Арсланова бар.
Нурият Кожаева.
Суьвретте: шара катнасувшылары.