«Китап акылы – табакта», «Китаптинъ ярасык оьрнеги – акылы». Китап акында соьйтип айтылган соьзлер аз тувыл. Элбетте, китап пан дослыгы болган аьдем бир заманда да вайымсыз, билимсиз эм эрши болып коьринмес. Онынъ ишки дуныясы да китап пан дослыгы йок аьдемнен коьпке баскаланады. Бир он-йырма йыллар артка кайтатаган болсак, сол йылларда китап бек ийги савкат, баалы зат эди. Колдан-колга, авылдастан-авылдаска коьшип, китап тозатаган эди. Аьлиги заман бираз баска, окыйтаганлар саны аз тувыл, ама китаптинъ орыны бираз туьрленген, кеби яктан да туьрленислер бар, олай дегеним, китаплердинъ электронлы кеплери де шыккан, кулланувга кирген.
Алдынгы заманларда китапханадынъ да орыны, мунда ис борышлар да баска эди, аьлиги заманда мунда да, янъы технологиялар аркалы, коьп туьрленислер кирген…
Тек исин суьйген аьдемнинъ бир заты да туьрленмеген. Ол куьн сайын оьзининъ ис борышларын яваплы кепте толтырып турады. Оьзи де куьн сайын китаплер туьзилген уьндириклер арасында юрип, аьр бир китаптинъ орынын, сонынъ аьр табагын суьйип актарады эм, бир неше кере кайтарып актарса да, аьр актарувы ман, таныс аьриплер мен, сыдыралар ман коьзин ювыртса да, оьзине бир янъылык ашады…
Ногай район Орталык китапханасына абытымды алып киремен. Аьр кайсы заманда да мунда сени коьзлеринде нур ойнаган, шырайларында куьн саьвлеси яйнаган кыскаяклылар йолыгады. Мунда ис борышыма коьре яде болса, оьз куллыгым болып кире калсам, сол хатынлардынъ коьнъиллерининъ токлыгына сейир этемен… Элбетте, сайлаган кесписин, бийлеп олтырган ис орынын суьйген
аьдем соьйтип этпеге болады деген ой да келеди.
Аьли соьзим Ногай орталык китапхана куллыкшысы Арина Джумагельди кызы Якубова акында болады. Арина Якубова юриткен неше шатлыклы шарада да ортакшылык эткенмен. Аьр кайсы заманда да онынъ бир кепте соьйлеген соьзи, сабыр тавысы суклангандай эди. А.Тахо-Годи атындагы музейининъ Ногай райондагы филиалында не шаклы шаралар онынъ ортакшылык этуьви мен
оьткерилгени де эсимде. Мунда оьткерилген шаралар китапхана ман музей араларында ортак болса да, музей етекшиси ДР ат казанган маданият куллыкшысы Каирбек Бальгишиев сол исти Арина Джумагельди кызына тапшыратаган эди. Бу куьнлерде Арина Джумагельди кызы уьстинликке етисип туры. Ол «Энъ де ийги китапхана куллыкшысы» деген шарадынъ енъуьвшиси болган.
Белгилейик, бу шара 2013-нши йылдан бери, Дагестан Республикасынынъ Аькимбасынынъ указына коьре, ДР Маданият министерствосы ман авыл китапханалар араларында оьткериледи. Шарадынъ озгарылув тарихинде Ногай районымыздан Кумлы, Уй-Салган авыл ерлеринде аьрекет бардыратаган китапханалар куллыкшылары катнасканлары эм енъуьвши болганлары да белгили. 2025-нши йылда болса, сол шарадынъ енъуьвшиси деген атка Арина Якубова да тийисли болды.
Арина Ногай орталык китапханасында тамада специалист болып куллык этеди. Ол исин яраткан, сайлаган кесписине алаллыгы ман, китаплерге уьйкен суьйими мен баскаланатаган куллыкшы болады. Буьгуьнлерде онынъ алган савгасы – онынъ исининъ тамамлары. Ак юрегимизден сулыплы китапхана куллыкшысын савгасы ман, етимиси мен кутлаймыз. Алдыда тек уьстинликлерди йораймыз.
Галима Курганова.
Суьвретте: А.Якубова
