Янъыларда Дагестан Республикасынынъ Оькиметинде ана тилди саклар уьшин этилмеге керек шаралар планлары ойласылды. ДР Халк Йыйынынынъ Билимлендируьв эм илми бойынша Комитетининъ ис куьби сол ниет пен янъы маслагатларды берди. Бу куьн кабыл этилген ой-токтасларды яшавга шыгарар уьшин Дагестан Республикасынынъ Билимлендируьв эм илми министерствосына йиберилеек. Мунда болса, сол маслагатлар толы кепте ойласылмага тийисли болады.
– Бу туьзилген ис куьбининъ сыраларына ана тилдинъ уьйренуьви бек маьнели экенин анълайтаган аьдемлер киргенлер.
Олардынъ борышы – ана тилдинъ буьгуьнлерде осалланган аьллерин ийгилендируьвге каратылган шараларды токтастырув эм яшавга шыгарув уьстинде ислев, – деди Билимлендируьв эм илми бойынша Комитетининъ председатели Елена Павлюченко. Ис куьбин туьзуьв акында оьз ойы ман Дагестан Республикасынынъ Халк Йыйынынынъ депутаты Узлипат Гасанова шыгып соьйлеген эди. Ана тиллерди саклав акында соьйленген йыйында куьп агзалары билимлендируьв учреждениелеринде ана тилди уьйренуьвге каратылган шаралар акында тувралап айттылар, олар беркитилген ой-токтаслар да эттилер.
Йолыгыстынъ тамамында балалар бавларында да ана тилди уьйретуьвди программага киргизбеге, педагогикалык орта окув учреждениелеринде ана тиллер бойынша кеспи беруьвди эм оларга диплом бергенде «ана тил бермеге ыхтыяры бар» дегенди кайтарув, ана тилден окытувшыларды эм тербиялавшыларды колтыклав бойынша регионаллык программаларды кабыл этип алув, йогары эм орта окув учреждениелеринде ана тилди уьйретуьв саьатлерди коьбейтуьв, коьпмиллетли мектеблерде 1–4-нши классларда ана тил сабагы дайымлык болмага керек дегенди токтастырдылар. Солай ок, ана тилди уьйренуьв эм кенъейтуьв уьшин цифровой платформаларды туьзуьв акында да соьз коьтерилди.
Ана тилди саклав уьшин аьр бир миллетли аьдем оьзи де куьшин аямага да керек тувыл. Тил болса, миллет те бар.
Э.Кожаева.