Сав элимиздегиндей эм республикамыздагындай болып, Ногай районымызда да ерли самоуправление органларына депутатларды сайлавлар болып оьттилер. Аьр бир авыл ериндеги депутатка кандидатлардан сайлавшылар, оьз ойларына коьре, энъ де тийисли дегенлерин сайладылар. Аьр бир сайлав участогы оьзлеринде сайланган депутатлардынъ списокларын белгиледилер эм аьлиги заманда аьр авыл депутатлар йыйынлары оьз сыраларыннан район Депутатлар Йыйынына депутатларын сайлап коьрсеткенлер. Соьйтип быйыл куьзде сайланган депутатлар оьз авыллары эм районымыз уьшин эндиги 5 йыл узагында парламент аьрекетин юритееклер.
Дурысын айтканда, сайланган депутатлар тойга яде байрамга деп сайланмаганын анъламага тийисли деп ойлаймыз. Районымыз бойынша йыйылган маьселелер аз тувыл.
Солардынъ бир хыйлысы йылданйылга шешилмей калып келе бередилер. Айтпага, бирер фермерлер, арендаторлар эгин ерлерге яде мал отлакларды яде патшалык орманлык фондынынъ ерлерин айдап, бакша оьстирген сонъ, топыракта яйратып пленкаларын калдырадылар. Сол пленкалар ер-ерге шашырап ерди заялайдылар,
онда-мунда ушып шоьлдинъ коьркин бузадылар. Бу маьселединъ акында юз кере айтылган эм бизим газета бетлеринде язылган болса да, сол коьп-коьз коьре шешилмейди. Ерден пленкады йыюв – тавдан тас авдарув тувыл деп ойга келеди, сол куллыкты фермер яде арендатор оьз аьели яде кардаш-ювыклары ман яде биревлерге акын тоьлеп йыйнатпага да болады.
Ама коьремиз, йыйнамайдылар! Сондайларга закон бойынша дембисин этпеге керек деп те коьп кере айтылган. Авыл басшылары явапка уьндемейдилер яде сондайларга штраф оьлшеми бек аз – 500-1000 маьнет акша дейдилер. Дурыс, ол зат солай болмага да болар. Эм сол штраф оьлшемин район Депутатлар Йыйыны оьстирип болмаса, тийисли хат язып республика парламентине шыкпага ярамайма экен? Олар да болмайтаган болса, РФ Государстволык Думага шыгув керек болар. Ерди заялайтаган аьдемлерге штраф тувыл, уголовлык исин де ашпага тарык! Сондай законларды, керек болса, кайтадан карастырып, каты этпеге бир кыйыны да йок. Законопроект аьзирленеди эм Госдумага ойласувга йибериледи, депутатлар бир неше окылувдан соны кабыл этедилер.
Тек сол исти тоьменнен баслав керегеди, авыл депутатлардан. Оьзимиздинъ яшап турган тувган еримизди заялап коюв – ол оьзимиз олтырган теректинъ бутагын пышув. Мине сондай тек бир маьселе акында соьзди козгадык. Район еринде соны шешпеге заман коьпте еткен.
Эндигиси биз сайлаган депутатларымыз бу соравды шешер сама деп уьмит этемиз.
Туврасын айтканда, йогарыда белгиленгенлей, шешилмеге тийисли соравлар аз тувыл. Солардынъ тагы да бир маьнелиси – район орталыгында кокыс таславды бир йорыкка келтируьв. Бу эки маьнели соравлар шешилсе яде шешилип басланса, биз, сайлавшылар, сайлаган депутатларымыз сенимимизди аклап басладылар деп ак
юректен айтармыз. Аьли уьшин янъы сайланган депутатларымызга парламент аьрекетинде уьстинликлерди, авыл-эли, халкы уьшин кайратлыкты эм белсенликти йораймыз!
М-А.Ханов.
