Быйыл язлык Дагестан ерине баьле-каза болып келди, ол мынълаган дагестанлылардынъ яшавын туьрлендирди. Коьплеген аьдемлер уьйсиз калдылар, оькинишке, оьлгенлер де бар. Баьримизге де болып турган аьллер – кайгылы оьзгерис. Бу куьнлердинъ ишинде баьле-казадан зыян коьргенлерге
ярдам этилинип турады, элимиздинъ баьри якларыннан да коьмек келеди. Сол зат кыйынлыкта да, яхшылыкта да бизим бирлигимизди ыспатлайды.
Россия Президенти Владимир Путин республикада болып турган аьллерди оьз тергеви астында ыслап турады. Элимиздинъ басшысы бу сорав бойынша уьйкен кенъес оьткерди. Йыйын барысында ол ведомстволар эм службалар етекшилерине сув тасувдан зыян алганларга коьмек этуьв, шагынувлар, тилеклер болса, тез аьрекетлеп шешуьв керек деп тапшырды.
Кенъестинъ басында Владимир Путин республикада куьн аьллери аьдеттегиндей тувыл экенин белгиледи. Навруз айынынъ 30-ншы куьнинде уьш айдынъ ишинде явмага керек ямгырлар явган. Коькек айдынъ 5-нши куьнинде Дербент районында Геджух сув саклавыштынъ дамбасын сув ман аькетти.
– Аьдемлерге коьмек этуьв, оларды коьтергишлев, болып турган аьллердинъ акында билдируьв керек. Сувдан зыян келтирилген яшавшыларга медициналык, праволык коьмек заманы ман этилинмеге тийисли, – деди Россия Президенти.
Баьле-каза келтирген йойымнынъ да оьлшемин билуьв керек деген борыш салынды чиновниклер алдында. Владимир Путиннинъ айтувы ман, бу куллык
тынышлардан тувыл. Аьр бир аьел мен айырым ислев керек, куллык йогары кеспили дережеде юритилгенин талаплады элимиздинъ басшысы.
Владимир Путин болып турган оьзгерислер мен байланыста республикада электроярык пан аьжетсизлев ислерине айырым маьне берди. Ол Дагестан
Аькимбасы Сергей Меликовтынъ, Махачкала каласынынъ, Дербент эм Хасавюрт районларынынъ етекшилерининъ, ведомстволар ваькиллерининъ докладларын тынълады. Соны ман байланыста баьле-казадынъ калдыкларын тайдырув ниет пен ис куьбин туьзбеге деген карар алынды. Соны ман
бирге Россия Президенти аьдеттен тыс аьллердинъ дережесин регионаллыктан федераллыкка коьширмеге токтасты. Дагестан Республикасынынъ Аькимбасы Сергей Меликов республикада аьллер аьли де ийгиленмегени акында билдирди, сув аьли де тасымага болатаганын айтты.
– Биз куьн аьллери осалланмага болатаганга аьзир, – деди Сергей Алимович. Буьгуьнлерде Дагестанда аьллер кыйынлы болып туры. Тек кайбиримиз де энъ де яман затлар артта деп сенемиз. Дагестанлылар аьр заманда да оьзининъ берклиги мен, куьши мен данъклы болганлар. Энъ де маьнелиси, оьзлерининъ яшавын, куьшин аямай, олар баска биревлердинъ яшавларын куткармага аьзир.
Меним коьпмиллетли Дагестан элимнинъ аспанында куьн яйнасын. Ол тек сув алган ерди тувыл, баьле-каза тийген инсанлардынъ да янларын йылытсын.
Республикамызда болып турган аьллерди Россия Президенти Владимир Путин, Дагестан Аькимбасы Сергей Меликов, калалар, авыллар етекшилери оьз тергеви астында ыслап турадылар, баьри службалар да кеше-куьндиз баьле-казадынъ калдыкларын тайдырув ниет пен ислеп турадылар. Сога коьре, аьр бир аьдемге коьмек этилинер, неге десе буьгуьнлерде сол – энъ де бас борыш.
Г.Бекмуратова,
Россия Язувшылар союзынынъ агзасы.