Озган юмадынъ ишинде Дагестан Республикасынынъ Аькимбасы Сергей Меликов бесинши кере дагестанлылар ман тувра линия озгарды эм республика яшавшыларынынъ соравларына явап берди.
Эки юмадынъ узагында оьз соравларын дагестанлылар туьрли социаллык тармакларына йиберип турдылар. Соны ман, тувра линияга эки мынънан артык соравлар туьстилер, олардынъ коьбиси Махачкала, Каспийск, Дербент калаларынынъ, Цунтин, Ахты районларынынъ яшавшыларыннан эди.
Соравлардынъ аьр бириси маьнели эм заманы ман эди. Олардынъ ишинде – ЖКХ, ер-муьлк, СВО катнасувшыларын коьтергишлев, яшав сапатын ийгилендируьв мен байланыслы соравлар. ВКС байланысы бойынша тувра линияда район етекшилери, толтырув властининъ басшылары ортакшылык эттилер, олардынъ куллыгы ман байланыслы соравларга явап берип, республика аькимбасыннан тапшырувлар алмага аьзир эдилер.
Быйыл Сергей Меликовтынъ тувра линия шарасы Согыс данъкынынъ музейинде оьтти, бу меканда Уллы Енъуьвдинъ 80 йыллыгын байрамшылав ман реконструкция этилинген.
Ашык диалог барысында Сергей Меликов Аталыкты коршалавшы йылынынъ сырагыларын келтирди, сол йылдынъ ишинде этилинген куллыклар акында хабарлады. План бойынша салынган шаралардынъ коьбиси оьткерилген, калганлары йылдынъ ызында озаяк. Савлай республикамыз бойынша туьрли
акциялар, выставкалар, конференциялар, спорт ярыслары, концертлер озгарылган. Уллы Аталык согысынынъ ветеранлары эм СВО катнасувшыларынынъ сыйына мемориаллык такталар, эстеликлер ашылган, китаплер баспаланган. Бу шараларда ясуьйкенлер де, яслар да белсен катнасканлар.
Сергей Меликов СВО катнасувшыларына эм олардынъ аьеллерине кайдай коьмек этилинетаганы акында айтты. Самур тавлардынъ бийикликлерининъ бирисине СВО еринде биринши Россия Баьтири Нурмагомед Гаджимагомедовтынъ атын бермеге керек деген ой да айтылды. Сол сорав бойынша карар бу куьнлерде шыгарылган.
Республика басшысы ЖКХ соравлары бойынша да тийисли явап берди. Онынъ айтувы ман, Дагестанда сол маьселеди шешуьв бойынша баьри амаллар да алынады.
Айырым тема тувра линия барысында – йоллардынъ аьллери. Сергей Алимович сол сорав бойынша этилинип турган ислерди айтты.
Шара барысында муниципалитетлер етекшилерине тапшырувлар этилинди – Карабудахкент районынынъ яшавшысына сакат коляска алмага коьмек этпеге, Махачкала тоьгерегинде ямагат транспортты коьбейтпеге, Сарыкум буйратынынъ бурынгы вокзалын янъыртпага эм сондай баска.
Шарадынъ ызында Сергей Меликовка бир бала Янъы йылда савкат алмага суьетаганы акында билдирди. Ол Янъы йылда Дагестаннынъ баьри аьеллеринде де балалар савкатлар алып суьйинсин деген тапшырув этинъизши деп тиледи.
Сергей Меликов Янъы йыл байрамын, кыйынлыкларга карамастан, суьйинишли, наьсипли эм ыспайы этейик деген соьзлер мен тамамлады тувра линияды.
Уьш саьат узагында оьтти ашык диалог. Коьплеген соравларга яваплар берилди, тийисли тапшырувлар этилинди. Айтылмаган соравлар каралаяк эм аьр бир дагестанлы явапсыз калмаягына сендирди республика етекшиси Сергей Меликов.
Тувра линия оьтуви акында экспертлерининъ, ямагат организацияларынынъ ваькиллерининъ, етекшилерининъ ойларын газетамыздынъ 2-нши бетинде окымага боласыз.
Г.Бекмуратова.
