Ногай район администрациясынынъ пресс-службасы билдиреди: Янъыларда район аькимбасы Джамалутдин Эсиргепов аьдетли шара – гражданларды кабыл этип алувды озгарды. Сонынъ барысында коьп маьнели соравлар каралдылар. Бу йол йолыгыска согыс спецоперациясынынъ аьеллерининъ ваькиллери келдилер. Аьр бирисининъ оьз тилеги, мырады бар эди.

Бу куьнлерге сес-хабарсыз йок болган СВО катнасувшысынынъ анасы Тойбике Каратаева район аькимбасына онынъ увылын излевде ярдам этпеге тилек салды. Район аькимбасы оьз ягыннан колыннан келген коьмегин этпеге шалысаягын билдирди.
Янъыларда йигитлерше ян берген согыс спецоперациясынынъ катнасувшысы Рашидхан Ханмурзаевтинъ карындасы ТереклиМектебтинъ Гагарин атындагы орамындагы (мунда бир неше СВО катнасувшысынынъ аьеллери яшайды) йолды карамага, туьзетпеге тилек салды.
Ногай район аькимбасы Джамалутдин Эсиргепов ветеранлар эм олардынъ аьеллери яшайтаган орамларда яшавга тийисли шартларды туьзбеге, йол курылыс эм ярастырув ислерди этуьвге тийисли организацияларга борышлар берди.
Белгилеп озайык, 2025-нши йылда Рабочая (ПМК) орамында, мунда уьш ян берген СВО катнасувшыларынынъ аьеллери яшайдылар, йолды туьзетуьвге буйырык берилген эди. Орам ярастырылган, энди тек ярык беруьв алатларды ерлестирмеге калган.
Гражданлар ман йолыгысувлар– власть органларына ямагаттынъ ишинде бар маьселелерин терен билмеге амал береди. Сол ис тамамларын да коьрсетеди.