Янъыларда Дагестан Республикасында ис визити мен Россия МЧС министри Александр Куренков болды. Ол республикадынъ от туьсуьв-куткарувшы боьликлердинъ исин тергеди эм йигитлик коьрсеткен куллыкшыларга баргылар тапшырды. Александр Куренков ДР Аькимбасы Сергей Меликов пан бирге
56-ншы от туьсуьв-куткарувшы боьликте болды, айырым эс куллыкшылар уьйренетаган ерге берди. Мунда пожарныйлар уьйренедилер, туьрли ярыслар озгарадылар. Министр куллыкшылар ман йолыгысты, олардан ислемеге боьликте амаллар кайдай экенин сорады.
Солай ок МЧС етекшиси Караман-6 еринде орынласкан от туьсуьв-куткарувшы отрядынынъ куллыгын тергеди. Отрядта 60 аьдем ислейди, техникадан 40 коьликлер бар. Куллыкшылар республикалык орталыгынынъ кавыфсызлыгын аьжетсизлейдилер.
Озган йылдынъ ишинде пожарныйлар 80 кере излев-куткарув операцияларында катнасканлар, 64 аьдемди куткарганлар. А.Куренков боьликте оьз административли мекан, коьликлер туратаган, ясалатаган ерлер бар экенин коьрди.
Министр отрядты келеекте оьрлендируьв ниет пен амаллар алмага керек деп тапшырды. А.Куренков «112» службасынынъ, от туьсуьв байланысынынъ орталык пунктынынъ, кыйынлы аьллерде ислев орталыгынынъ аьрекети мен танысты. Ол бу службалар биргелесте ислейтаганы бек маьнели эм пайдалы экенин белгиледи.
Ис визитин тамамлай келе, министр ийги ислегени эм йигитлиги уьшин медальлер тапшырды. Баргыга тийисли болганлардынъ арасында канътар айында
татавылга туьскен автобустагы аьдемлерди куткарган Махачкала яшавшылары Ахмед Магомедов, Алимирзе Наврузбеков эм Абдулсамад Омаров бар эди. Коьрсеткен йигитлиги уьшин оларга Россия МЧС «За спасение погибающих на водах» медали тапшырылды. Солай ок озган йыл Буйнакск районынынъ Нижний Дженгутай авылында янып турган уьйден доьрт балады эм олардынъ анасын шыгарган Закир Исрапиловка баргы берилди.
Россия МЧС министри Александр Куренков Дагестан Республикасынынъ от туьсуьв-куткарув службасынынъ йогары дережеде аьрекет этетаганын белгиледи.
Бизим хабаршы.