Билим куьниннен алдын Дагестан Республикасынынъ Ямагат палатасынынъ агзасы, Ногай районынынъ кыскаяклылар советининъ председатели Асият Манкаева район администрациясынынъ ислери мен каьрлевши куллыгын кесек заманга юритуьвши Алия Кусегенова ман бирге согыс спецоперация катнасувшысынынъ кызын окув йылы басланувы ман кутладылар. Асият Манкаева Ставрополье Кыскаяклылар союзынынъ председатели, Ис баьтири Татьяна Чумаковадынъ коьтергишлеви мен Дагестаннынъ Кыскаяклылар союзынынъ председатели эм ДР аьскершилердинъ аьеллери бойынша комитетининъ председатели Интизар Мамутаева атыннан согыс спецоперация катнасувшысы Ислам Абдулбариевтинъ кызына окувга керекли алатлары ман рюкзакты савгалады. Ол кызды кырк кийик айынынъ 1-нши куьни мен кутлап, ога окувда бийик етимислер йорады.
Сол ок куьн Ногай районынынъ Червленные-Буруны авылында согыс спецоперация катнасувшыларынынъ аналары ман да йолыгыс уйгынланып озды. Шара авыл администрациясында муниципалитет аькимбасы Рустам Абдулбариевтинъ катнасувы ман, эм, солай болып, СВО катнасувшыларынынъ аналары эм ян косагы, айтпага, аьскершилик борышын толтырувда увылын йойган Оразбийке Джумандыкова, увылы СВО еринде оьз аьскершилик борышын тийисли толтырган Феруза Аманкаева ман, согыс спецоперация юрген ерде кызы медсестра эсабында катнасатаган Рысбийке Нурласанова эм ян косагы Элимиздинъ межелерин йигитлерше коршалап
юрген Румия Телековадынъ ортакшылавы ман оьтти.
Баска болып, конаклар санында Червленные-Буруны авылдынъ З.Акмурзаев атындагы орта мектебининъ педагогы, ямагат катнасувшысы Курасхан Муслимова эм авыл администрациясынынъ специалистлери де катнастылар.
Суьвретте: шарадан коьринис.