Согыс спецоперация басланганнан алып, савлай Россиядынъ, солай болып, Дагестан Республикасынынъ Ногай районынынъ яшавшылары да аьскершилеримизге ярдамласып келедилер. Олар аьскершилеримизге посылкалар йыювда, шилтерлер согувда эм гуманитарлык югин йыювда катнасадылар. Сол этилетаган ийги ислер аьскершилеримизге согыс аьллерин енъиллетпеге эм уьйде оларды енъуьв мен саклайтаганларын эм оларга сенетаганларын сезбеге амал бередилер. Янъы йылдан алдын «Шоьл тавысы» республикалык газетасынынъ куллыкшылары байрамды алдышылыкта карсы алаяк согыс спецоперация
юрген ердеги аьскершилерге йибердилер. Савгалар эсабына йылы ювырканлар, тастамаллар, юн шораплар, дарманлар, азык-туьлик, таьтли зияпетлери кирдилер. Юма сайын СВО еринде коркынышсызлык, йигерлик коьрсетип келетаган ердеслеримиздинъ йигитликлери акында очерклер, зарисовкалар, репортажлар баспаланып келетаган газетадынъ янъы номерлери де айырым орынды алдылар. Баска болып, газетамыздынъ бетлеринде аьскерши ердеслеримиздинъ катнасувы ман район бойынша болып озатаган шаралар да орын табадылар. Редакция куллыкшылары мундай саваплык акцияларында биринши кере катнасып калмайдылар. Баска район организациялар ман бирге газета куллыкшылары аьскершилерди явдынъ куьллесиннен коршалав уьшин
шилтерлерин согадылар, гуманитарлык югин йибередилер, аьр ай сайын редакцияда туьрли авыллардан кесек заманга тыншаювга келген согыс спецоперация катнасувшылары ман йолыгыслар озгарадылар. Солай болып, олар ман сол маьнели шаралар, оьзгерислер коьлем билдируьв амалларында тез арада баспаланып шыгадылар.
Белгилеп озайык, 2023-нши йылда «Шоьл тавысы» газетасынынъ бас редакторы Эльмира Кожаева делегация тизиминде СВО ерине гуманитарлык югин еткеруьвде ортакшылык эткен эм ол юктинъ керекли ерине дейим еткерилуьви акында айырым репортаж да язып баспалаган. Сондай посылкалар бизим
аьскершилеримиздинъ коьнъилин коьтеруьвде маьнели орынды аладылар. Фронтка уьйден йылувлыктынъ кесегин йиберуьвлери мен аьр бир редакция куллыкшысы савгаларга оьз янын салып, аьскершилердинъ юреклерин оьзлерининъ катнасувы ман йылытпага шалыстылар.
Алдышылыктагы ердеслеримизди коьтергишлев, Енъуьвди ювыклатувга оьз уьлисин косув, оларга, бир затка да карамастан, байрам коьнъилин сездируьв – сол онъайлы истинъ бас мырады эди.
Г.Нурдинова.
Суьвретте: СВО юрген ерге посылкалар йиберуьв мезгили.