Йигитлик. Аьдемнинъ маьнели касиетлерининъ бириси. Аьр бир инсанда ол туьрли. Кайдай ол – баьтир? Йигерли инсан оьзинде аьр заманда да коркыныштан йогары болмага куьш табады, ол оьзининъ эткен ислери уьшин яваплы.
Эгер тынышлы соьзлер мен айтсак, бу касиет аьдемди оьз принциплерине, коркыныш, аьжел, кавыфлык алдында борышына алал этеди.
Ставрополь крайынынъ Нефтекум районынынъ Коясыл авылынынъ яшавшысы Инар Загир увылы Бекмухамедов 1995-нши йылдынъ язлыгында тувган.
Загир Ибрагим увылы эм Зульфия Башир кызынынъ аьели сол заманда Пятигорск каласында яшайтаган болган. Инар аьелде увыллардынъ уьйкени. Имир эм Имран агасыннан коьрим аладылар. Коясыл авылында мектебти битирип, Инар Пятигорск каласындагы политехнический университетине окымага кетеди. Эр борышын Карашай-Шеркеш Республикасында Зеленчук каласында толтырады. Сондай эди ногай ястынъ яшавы согыс спецоперациясына кеткенше. 2024-нши йылдынъ канътар айында Инар Бекмухамедов Аталыгын коршалав ниет пен СВО ерине кетеди. Онынъ бас мырады – явдан тувган ерин босатпага, аьр бир аьдемнинъ аспаны да, яны да тынышлы болсын.
Буьгуьнлерде Инар Донецк еринде штурмовой куьпте куллыгын бардырады. Биз анълаймыз, кайтип оларга кыйынлы, кайтип ясларымыз киев режиминнен зыян коьретаган тынышлы яшавшылар туратаган ерлерди яман явдан босатадылар. Олар енъуьвди ювыклатадылар. Инар Бекмухамедовка ийги коьрим онынъ атасы. Загир Ибрагим увылы – МВД ветераны. Атасы да, увылы да оьз юреклеринде уьйкен атайы Казмухамбет Абдул увылы Бекмухамедовтынъ акында эс саклайдылар. Уллы Аталык согысынынъ ветераны 1941-нши йыл явга карсы турган, Харьковты, Днепрды, Каховкады коршалаган. Сталинград уьшин йигитлерше согыскан. Сол согысувларда каты яраланган, Аталык согысынынъ ордени мен, «За оборону Сталинграда», «За оборону Одессы» медальлери мен савгаланган.
– Меним уьйкен атайым Украинады немец фашистлериннен коршалаган, биз олардынъ исин бардырамыз. Биз олардынъ баьтирлигине, эсине тийисли болмага шалысамыз. Олар явды енъдилер.
Биз де сагынышлы енъуьвди аькелермиз элимизге, – деп айтады Инар Бекмухамедов. Йигерли эр кисидинъ соьзлери. Сол касиеттинъ иеси кайсы аьллерде де аьдем болып калады, аьдилликти, намыслыкты сайлайды. Сол сайлавды ол кыйынлы аьллерде тувыл, куьн сайын этеди.
Баьтирлик, коркынышсызлык, намыслык касиетлери Инарды эм онынъ йолдасларын аьлиги кыйынлы заманда сакласынлар. Аталык оларды сайлады. Оны
коршалап болган шынты эр кисилерди.
Г.Бекмуратова.
Суьвретлерде: Уллы Аталык согысынынъ ветераны К.Бекмухамедов; СВО катнасувшысы И.Бекмухамедов йолдасы ман.
