Офицер болув – ол оьзинънинъ сав яшавынъды аьскершилик исине, Аталыкка куллык этуьвге багыслав. Бу шынты эр кеспиди бала шагында яде яслыкта сайлайдылар. Россияда офицерлер дайым да халкымыздынъ оьктемлиги болганлар, офицер болмага ниет этпеген бир кеде де йок болар, ама сога баьри де етисип болмайды.
Бизим яс ердесимиз, офицер Замирхан Отемисов согыс спецоперациясы басланатаган 2022-нши йылдан алып сонынъ белсенли катнасувшыларынынъ бириси болады. Ол да, коьплеген согыс офицерлериндей болып, сол кеспи акында аьли де тувган-оьскен Червленные Буруны авыл орта мектебинде окыйтаган заманнан алып ниет этип келген. Бу алдынгы оьзининъ айтылган ис баьтирлери мен мактавлы авылда тувув оьз халкынъа, элинъе бир зат
пан сама пайдалы болмага керек дегенди анълатады.
Ол 2-нши фермада яшайтаган Отемисовлардынъ куллыкшы аьелинде тувып оьскен. Кишкей заманыннан алып атасы Амирханнынъ кошарасында ис аьрекетине уьйренген.
Анасы Салимет – айтылган койшылар Сабутовлардынъ асылыннан, онынъ атасы – оьз заманында республикада аты кенъ белгили, Социалист Истинъ Баьтири Кадыр Сабутов.
Анасынынъ тувган аданасы Курманбай Сабутов та кыйынлы 90-ншы йылларда «Червленные буруны» патшалык заводты етекшилеген.
Сол себептен келеектеги офицерге яшав йолынынъ басында яркын уьлгилер аз болмаган. Тувган авылында орта мектебти окып кутарган сонъ, Замирхан Санкт-Петербург каладагы Аьскер инженер-техникалык университетине окувга туьседи. Мунда окув йыллары онынъ шаркын да, янын да берк болмага шыныктырды, билим оьлшемин оьстирди.
Каладынъ баьтиршилик ореолы, архитектура эстеликлери, озган оьмирлердеги бай меканлар, майданлар, музейлер эм, элбетте, окув куьнлери – булар баьриси де яс курсантлардынъ юреклеринде тувган Аталыгына шынты суьйимликти, терен патриотизм сезимлерди эм оьзлери сайлаган йолларына алаллыкты тувдырды. Сонынъ уьшин де болар Донбасста 2022-нши йылдынъ басында россия аьскерлерининъ согыс спецоперациясынынъ басланувы ман Замирхан Отемисов та сонда йолланады. Ога дейим, университетти окып биткен сонъ, яс лейтенантты Забайкальский аьскер округындагы аьскер боьликлерининъ бирисине куллык этпеге йиберген эдилер. Соннан ол СВО-га кеткен.
Эндигиси бесинши йыл Замирхан согыс спецоперациясында белсен катнасып келеди, сол заман ишинде дав аьрекетин оьз коьзлери мен коьрип, энъ де маьнелиси, согыста бек керекли кавга сулыбын да алган.
Ногай халкынынъ ийги аьдетлери мен тербияланган эр йигит оьзи эм дав аьрекети акында айтпага суьймейди. Тек сол ок заманда онынъ ийинлериндеги офицер аьпелеклери эм согыс савгалары онынъ баьтирлиги акында уьндемей шайытлайдылар. Окувды кутарып, СВО еринде катнасып келетаган заманыннан алып Замирхан Отемисов лейтенант дережесиннен гвардия подполковниги – бизим армияда йогары аьскер дережелерининъ бирисине етискен. Данъклы аьскер куллыгы уьшин ол РФ Коршаланув министерствосыннан 10 медальлер мен савгаланган. Солардынъ ишинде «Йигитлик уьшин», 1-нши эм 2-нши дережели «Йигерлиги уьшин», «Аьскер куллыгында уьстинлиги уьшин» эм баскалары да бар. «Согыс согыс кебинде, ама яшав оьз йорыгы ман» деп кенъ белгили канатлы соьзлерди бираз туьрленте берип, макаламды битиргим келеди. Сол яшав суьер ийги соьзлерди Замирхан Отемисов ердесимиздинъ татым аьели шайытлайды. Мунда оны эки кызлары ман увылы сенимлик пен куьтедилер.
М-А.Ханов.
Суьвретте: СВО катнасувшысы, гвардия подполковниги Замирхан Отемисов.
