Уллы Аталык согысы. Ол миллионлаган совет яшавшыларынынъ юреклериннен авырув болып оьтеди. Элимиздинъ 27 миллион аьдемлери сол согыста ян бергенлер, олар дайымларга бизим эсимизде сакланаяк, яс несилге ата-бабаларымыз баьтирликтинъ яркын коьрими болады, яв оларды йойыткан, тек эркликлерин сындырып болмаган.
Абибулла Шуваков согыска яслай кеткен, яс болып ол ата-анасынынъ, карындасы Равзаттынъ эсинде калган. Сес-хабарсыз йойылган ердесимиз, ол Ногай районынынъ Караногай авылында тувган эм оьскен, бу ерден давга да кеткен. Равзат-абай (яткан ери ярык болсын) яшаган шаклы аданасын каерден де излеген, балаларына да излерсиз деп аманатлаган. Куьтип турган болган, белки, Абибулладан бир хабар келер. «Эс китаби» баспаланган сонъ, Шуваков Абибулладынъ кардаш-тувганлары онынъ каерде койылганы акында билгенлер. Сол китапте булай язылган: «Шуваков Абибулла, 1922-нши йыл Ногай районынынъ Караногай авылында тувган. Кизляр ГВК ман шакыртылган. 85 гв.сд. 253 гв.сп. рядовойы. 1943-нши йылдынъ караша айынынъ 16-ншы куьнинде ян берген. Витебская областининъ Дубровенский районынынъ Судиловище авылында койылган».
Ювыкларынынъ айтувы ман, Абибулла Шуваков мектебте ийги этип окыган, дружина председатели болып сайланган. Оьз аьелин туьзбеге уьлгирмеди, согыска кетип, кайтпай калды. Ердесимиз 85-нши мергин дивизиясынынъ 253-нши мергин полкында куллык эткен. Дивизиядынъ ерди дурыс кулланув, дурыс карарлар алув, туьнде белсен аьрекет этуьв аркасы ман немец-фашистлердинъ коршалавы бузылган эм Смоленск операциясына заманында басланувга амал этилинген. Дивизия согысувлар ман алдыга 200 шакырымга кеткен, 6 йылгадан оьткен, 100-ден артык авыллар босатылган. Оршанск барысында 1943-нши йылдынъ казан-караша айларында дивизия каты согысувлар юритти, солардынъ бирисинде баьтирлерше согысып, ян берген Абибулла Шуваков.
Онынъ йиени, карындасы Равзаттынъ уныгы Арсен Иманали увылы Иманалиев Белоруссия еринде орынласкан кардаш камырына барып, уьйкен нагашакасы койылган ерине тувган шоьлининъ топырагын аькелди. Арсен Иманалиев бугуьнлерде СВО еринде эр борышын толтырады. Ол Кизляр районынынъ Большой Бредихин авылында тувган, атасы Иманали Али увылы – даргин миллетли, анасы Канитат Салим кызы Ногай районынынъ Орта-Тоьбе авылыннан. Арсеннинъ аьлейи Антонина – орыс миллетли, олар эки бала – увылы Салим эм кызы Канитатты тербиялайдылар. Соьйтип, Иманалиевлердинъ аьели – татым эм коьпмиллетли. Олар бир-бирисининъ аьдетлерине, динине сый этип, ийгиликте эм суьйимликте яшайдылар.
Арсен Иманалиев мектебти битирип, ДГПУ окув ошагынынъ тарих факультетине туьскен, озган йылдынъ курал айында СВО ерине оьз эрки мен кеткен. Арсен куллык этетаган аьскер боьлиги Запорожьеде яв ман согысады. 2024-нши йылдынъ караша айында Арсен Иманалиевке «Участнику специальной военной операции» деген медаль эм Сый грамота тапшырылган.
Биз оьз коршалавшыларымыз бан оьктемсиймиз, олар кыйынлы аьллерде енъуьвди ювыклатадылар. Арсенге эм онынъ йолдасларына уьйге аман-эсен кайтып келгенин йораймыз. Аьлиги заманда Аталыкты коршалап турган ердесимиз оьз атайынынъ эли уьшин янын бергенин эсинде саклайды эм оьзине яркын коьрим этип алады.
Г.Бекмуратова,
Россия Язувшылар союзынынъ агзасы.
Суьвретлерде: кардаш камырдан язув; А.Иманалиев.
