Ногайлар айтадылар: «Заман келсе, карт оьлер, аьжел келсе, яс оьлер». Баьримизге де кыйынлы заманлар болып туры. Элимизге де, сол элди коршаламага
атланган йигитлеримизге де. Заман ийги дегенлерди сайлады. Коркыныш деген не зат экенин билмейтаганларды. Олар янын, куьшин аямай, согысадылар. Керек болса, аьжелдинъ коьзине де карайдылар. Оькинишке, ызгы кере караганлар да бар.
Фарид Джумагишиев Карагас авылында тувып-оьскен. Яслыгы да оьтти ногай шоьлинде. Ол «Айланай» фольклор-этнографиялык ансамблининъ артисти болып бир кесек заман иследи. Оьзининъ тенълериннен Фарид баскаланмайтаган эди, авыл ясынынъ яшавы куьндегилик ислерге, каьр шегуьвлерге
толы болган. 2018-нши йылдынъ карагыс айында Фарид Джумагишиев эр борышын толтырмага кетеди эм Алейск каласында кинолог болып аьскерлер боьлигинде куллык этеди. Сонъ яс авылга кайтып келип, аьел курады, яслар эки кыздынъ ата-анасы болып, олардынъ аьр бир соьзине, ланъкасына, ойынына куьезленип туратаган эдилер. Фарид айлак куьшли суьетаган эди кызларын, мен коьзяслар ман ол кызынынъ шашларын оьрип турган видеоды кайта-кайта карайман.
Фарид СВО ерине кеткенше, аьдемлерди аттынъ уьстинде олтырып, юрип уьйрететаган болган, оьзи атларды саклаган. 2024-нши йылда Фарид Баймурза
увылы Джумагишиев Россия Коршалав министерствосы ман контракт туьзген эм СВО ерине Аталыкты коршаламага кеткен. Согысувлардынъ бирисинде ол каты яраланады, ама берилген борышты толтырады. 2025-нши йылдынъ кырк кийик айында Фарид Джумагишиев (позывнойы Фарик) «За отвагу» медалине коьрсетилген. Бизим ердесимиз – согыс аьрекетининъ ветераны. Ога 25 яс эди. Яп-яс, аьли де куьши де, яны да бар болган йигит.
Уьйге кайтпага, аьлейи мен аьвлетлерин оьстирмеге, аягына салмага ниети бар эди. Тек бакты баскалай буйырды.
Заман сондай йигерли йигитлерди айырды, олар бизим тынышлыгымыз уьшин янларын бердилер. Оьлимсизликке абытладылар баьтирлер.
Фарид Джумагишиев Покровское барысында 137-нши «Урал» бригадасында 2-нши батальонында куллык эткен. Рядовой, штурмовой ротадынъ мотострелковый взводынынъ боьлигининъ мергини. Фарид 2025-нши йылдынъ курал айынынъ 5-нши куьнинде ян берген. Кардаш-тувганларына онынъ оьлгени акында йолдасы (позывнойы Тема) билдирген. Ол айткан, кайтип Фарид оны оьлимнен куткарган, соны уьшин келип йолдасынынъ ата-анасына разылыгын билдиреек ол. Фаридтинъ баьтирлиги, йигерлиги акында хабарлайды йолдасы. Мен ойлайман, онынъ эсинде баска ерде тувып-оьскен, ама досына алал йолдас болган яс дайымларга калаяк. Фарид тувган авылында койылган.
Мен оны танымайтаган эдим, тек Фаридтинъ бек ювык аьдеми, меним окытувшым Сапият Бекмурза кызы Межитовады билемен. Биз, онынъ окувшылары, ОртаТоьбе авылынынъ мектебининъ 1984- нши йылдынъ выпускниклери, сол таркамастай кайгыды боьлисемиз, кардаш тувганларына бассавлык йораймыз.
Фарид Джумагишиев – баьтир, ол Аталыгын ызгы тынысына дейим коршалаган.
Гульфира Бекмуратова.
Суьвретте: Ф.Джумагишиев.