Янъыларда Тарумов районында муниципалитет аькимбасы Василий Джамалов пан согыс спецоперация барысында йигитлерше оьлген Мужаид Мамаевтинъ (яны курман болганнан сонъ) анасы Зухра Садрутдиновага патшалык савгасы тапшырылды.
Ол, йигиттинъ анасына соьзин карата берип, булай деди: «Биз буьгуьн сизинъ увылынъыздынъ эстелигине эм йигитлигине терен сыйды этуьвимизди билдиремиз. Мужаид Мамаев энъ баалы – оьз яс яшавын йогарымыздагы тынышлы коьгимиз, балаларымыздынъ ярык келеектегиси, Аталыгымыз уьшин савкатлады. Онынъ уьлгили коркынышсызлыгы эм шынты баьтирлиги элимиздинъ эм районымыздынъ тарихине дайымга орынласты».
Бу шатлыклы шарада Тарумов эм Ногай районлары бойынша военный комиссары Ваха Хадизов катнасты. Патшалыгымыздынъ етекшиси Владимир Путиннинъ буйырыгы ман Мужаид Сайпудинович Мамаев ян бергеннен сонъ «За храбрость» II дережели медалине тийисли этилди.
Сондай бийик патшалык савгасы онынъ йигитлиги, йигерлиги эм Аталыгына алал болувынынъ шайыты болады. Кочубей кала мектебининъ выпускниги Мужаид Мамаев оьз яшавын контракт бойынша аьскер службасы ман байлаган. Уьйкен оькинишке, ол согыс спецоперация юрген ерде оьз борышын яваплы эм йигитлерше толтырып, оьз яшавын элининъ кызыксынувларын коршалавда курман этти. Мужаидтынъ йигитлиги – ол тек тарих оьзгериси болып калмай, оьсип келеятырган несиллерге янлы уьлги, йогары баалыклары акында эскеруьв де болады.
Аьскершидинъ анасына тапшырылган савга – ол Эли аьр бир коршалавшысы акында эсинде тутатаганы эм саклайтаганы акында маьнели белги болады.
Йойымнынъ дертлиги уьйкен болса да, сол тапшырылган савга Мужаидтинъ оьз яшавын босына яшамаганы эм ол оны еримиздинъ тынышлыгы
уьшин курман эткенин беркитеди.
Суьвретте: СВО катнасувшысынынъ анасына савга тапшырылув мезгили