Бизим элимиз кайзаманда да аьдиллик уьшин куьрескен. Йигитлеримиз, куьшин де, яшавларын да аямай, Аталыгымыздынъ кызыксынувларын коршалаганлар. Йыл сайын Россия яшавшылары увыт айынынъ 15-нши куьнинде афганшыинтернационалист куьнин белгилейдилер.
Афган согысы – XX оьмирининъ тарихининъ кайгылы бетлерининъ бириси. Йыллар оьтедилер, куьнлер, айлар бир-бирисин авыстырадылар, сол кан тоьгисли йыллар да аьвелгиге кетедилер. Билдируьвлерге коьре, сол каты согысувларда 15 мынъ совет аьскершилер эм офицерлер оьз эр борышын толтырувда ян бергенлер, олардынъ акында эс дайымларга калаяк бизим юреклеримизде.
Афган согысы 1979-ншы йылдынъ карагыс айынынъ 25-нши куьнинде басланган эм 1989-ншы йылдынъ увыт айынынъ 15-нши куьнинде биткен. Согысувларда 620 мынъ совет аьскершилери эм офицерлери катнасканлар, олардынъ сырасыннан 72 аьдем Совет Союзынынъ Баьтири деген атка тийисли болган. Бизим элимиз йойыткан 15 мынъ аьскершилериннен 6 мынъ авырувлардан эм яраларадан тайганлар. Согыста 311 аьскерши сес-хабарсыз йойытылган. Ногай районыннан Афган
согысында 29 аьдем катнаскан.
Эстеликли куьн алдында Терекли-Мектеб авылында афганшы-интернационалист куьнине багысланып, митинг оьтти. Шарага аьскерши-интернационалистлерге
сый этип, район администрациясынынъ ваькиллери, авыл аькимбаслары, учреждениелер эм организациялар куллыкшылары ортакшылык эттилер. Кутлав эм хошлав соьзи мен МР «Ногайский район» администрациясынынъ аькимбасы Джамалутдин Эсиргепов, Ногай районынынъ Савытлы куьшлер эм ыхтыяр саклавшы органларынынъ Ветеранлар советининъ председатели Акманбет Сангишиев, Ногай районынынъ Афганшылар союзынынъ етекшиси Вахит Койлыбаев, Терекли-Мектеб авыл аькимбасы Марат Кулунчаков шыгып соьйледилер. ДР ат казанган артисткасы Зульфия Аджигеримова «Ак биюв» деген йырды йырлады.
Йыйылганлар Аталыктынъ япсарларын коршалавда ян берген баьтирлеримизди уьндемев такыйка ман эследилер. Сонъ келгенлер эстеликке гуьл байламлар салдылар.
37 йылдынъ артында совет аьскерлери Афганистан ериннен шыгып кеткенлер. Сол оьзгерис Совет Союзына 10 йыл узагында юрген афган согысынынъ тамамлавын белгиледи. Биз оьктемсиймиз баьтирлеримиз бен, олар йигитлерше Россиядынъ япсарларын коршалаган. Буьгуьнлерде олар оьзлери, увыллары, инилери согыс спецоперациясында Аталыкты коршалайдылар.
Гульфира Бекмуратова.