Дагестанда эр балаларды аталары кишкейлейин аьелининъ тиреви болмага деп уьйретедилер, олардынъ канына анасынынъ суьти мен коршалавшыларга келисли касиетлер белгилери синъеди, мектебте болса олардан шынты коршалавшыларын тербиялайдылар. Туьнегуьнги кеде балалар асыл болып, куьш-куватлы, коркынышты билмеген йигитлерге айланадылар. Мундай эр кисилер Элине кыйынлык келгенде, оны коршаламага, кайдай явга да карсы турмага, керек болса, онынъ уьшин энъ де баалы – яшавын да бермеге боладылар. Сондай увыллар – тек аталарынынъ тувыл, савлай халкынынъ эм Элининъ оьктемлиги. Сол баьтирлер мен Россия тек бу – согыс спецоперациясы бараяткан кыйынлы куьнлеринде оьктемсип калмай, оьмирлер оьктемсир, олардынъ атлары бир де мутылмас, олар халк юрегинде яшарлар.

Оьз ердеслерининъ, согыс йолдасларынынъ эм баьри ювыкларынынъ эсинде эм юрегинде яшайды СВО барысында яс янын берген, «За отвагу», «За освобождение Курска», «Участник СВО» медальлери эм оьлгеннен сонъ «За мужество» ордени мен савгаланган Алимурат Муслим увылы Алиев. Алимурат Алиев 2001-нши йылда Ногай районынынъ Таьтли-Булак авылында тувган.
Ол сегиз ясыннан алып спорт пан каьр шеккен. Яс туьрли спорт базласларда катнаскан
эм баргылы орынларды казанган, коьплеген савгаларга тийисли болган. Алимурат окувга да бет берген, кайсы ис те онынъ колында юйрик барган. Мектебтен сонъ да ол спортка кызыксынувын йоймаган эм Астрахань, Москва калаларында ислеген йылларында да Тайский бокс пан каьр шеккен. Кызмет кылувын Оренбургта артиллерия аьскерлеринде оьткен. Ердесимиздинъ белгилемеге болган коьп ийги касиетлери болган. Солардынъ сырасында алган карарыннан таймайтаганын, бир
ойы-аваслыгы болса, сога кайтип болса да ететаган болганын ювыклары белгилейдилер.
Солай болган Украинада согыс спецоперация басланганда да. Алимурат Элин коршалавшылар ман бирге болмага суьйип, СВО-га кетпеге атасы Муслимнинъ разылыгын алты ай узагына сораган.
Согыс спецоперация озып турган ерге яс ердесимиз 2023-нши йылдынъ казан айында
Санкт-Петербург каласыннан йолланган. Баслап ол генераллардынъ янында болган. Сондай аьллерде, согыс заманларда генераллардынъ касында, кавыфсызлык амалы эсабында, разведчиклер юргенлер. СВО озып турган ерде куллык эткен эки йыл ишинде ердесимиз коьп ерлерге йиберилген,
айтпага, Крым, Курск области эм баска яклар. Алимурат яраланганларды согыс майданыннан шыгаратаган болган, ол бек коьп бизим аьскершилерди куткарган эм «За спасение людей» медали мен савгаланган.
Псков десант-разведывательный куьбининъ – псков десантниклерининъ янъы несили сырасында Алимурат 28 кере разведкага шыккан. Уьйкен оькинишке, эндиги бирев де бир де Ногай халкынынъ эм Дагестаннынъ увылынынъ разведкага шыгувы, яв болган ерде де оьзин баьтирше юриткени акында кызыклы, оьктемлик тувдырган хабарларды эситпеек. Алимурат бир де куллыгы акында айтпаган, тек ювыкларына бир неше куьн яде бир неше юма оны ман байланыс болмаягын билдирген. Тувганлары соннан ол борыш толтырмага шыгаягын анълаганлар.
Ызгы кере разведкага Алимурат 2024-нши йылдынъ декабрь айында оьз командири мен шыккан. Анъсыздан орманнан явдынъ куьби коьринеди эм олар бетке-бет йолыгадылар. Душпаннынъ саны коьп болган, а бизим аьскершилер тек экев эди. Атыс басланады, куьлле Алимураттынъ аягына
тиеди. Сол куьн Алимурат СВО озып турган ерде явды соккан заман ишинде экинши кере
яраланады. Онынъ биринши ярасы енъил болган, эм йигит, бир кишкей заманнан сонъ,
аьскершилер сырасына тагы да кайткан. А бу куьнги ярасы бек авыр болады, эм яшавында, сонда болган туьрленислерде уьйкен маьнеди туткан эм, белки, онынъ уьзилуьвинде де себепли болган болар. Алимуратты оьз колларына коьтерип, командири – узын бойлы, каркыралы орыс йигит аькетеди. Бу ярадан сонъ, онынъ аягында куьллединъ 5 кишкей кесеклери шыгарылмай калады.
Эндигиден армаган Алимурат разведкада куллыгын бардырып болмайды, соьйтип оны
Десант-штурмовой бригадага коьширедилер. Мунда ердесимиз взводныйдынъ коьмекшиси болып куллык этеди, сегиз яс кедединъ командири болады. Ол, яс болса да, оьзининъ йолдасларынынъ арасында уьйкен сый ман пайдаланган, солай болган мектебте окыган йыллар да эм аьскерде де.
Алимурат эркин шоьл елиндей болып, коркынышты билмегентанымаган йигит болган, ама
онынъ юреги танъ эм юмсак эди. Онынъ эрлиги, дурыс ойга келуьви, оьзин аямавы, керекли заман коьмек кол созып болувы акында айтпага соьзлер табув кыйын. Авыр яраланган согыс йолдасы дав майданында калганын билгенде, Алимурат онынъ артыннан оьзи кетип, оны табып, кавыфлы ерден шыгарып, куткарган. Бу яс бизим ердесимизге тек согыс йолдас болып калмай, онынъ бир атадан эм анадан тувган инисиндей ювык болган. Куткарылувдан сонъ, бу ясты аягына тургызбага госпитальде эмлегенлер. Сол заманда да Алимурат йолдасы уьшин тынышсызланган, анасы Джамиляга Москвага барып, досын коьрмеге тилеген. «Оьксиз калган йолдасым балалар уьйинде тербияланган, онынъ уьшин яны авырыган, тирев болган биреви де йок, тек ялгыз меннен ол коьмек куьтпеге болады. Аявлы анам, сага уьйкен тилек, оны госпитальге барып коьрши». Кыскаяклы увылынынъ
тилегин ерге туьсирмей, Москвага барып, Алимураттынъ согыс йолдасын коьреди, ога кийимлер, азык-туьлик элтейди, йигитке яшавында бир де билмеген ана суьйимин, каьр шегуьвин савкатлайды. Сол заманда яраларынынъ авырлыгыннан аьли де соьйлеп болмайтаган СВО катнасувшысы кыскаяклыдынъ телефонына булай язады: «Эндиги меним анам бар, ол – Сиз!» Бу соьзлер Джамилядынъ юрегине тийип, коьзясларын тоьктиредилер. Алимураттынъ уьйкен акасы Амирдинъ белгилеви мен, иниси куьн сайын анасына занъ согып, менде баьри зат та аьруьв, кыйналма деп айтпаган куьн болмаган, борыш толтырмага шыккан куьнлериннен баска болып. Онынъ соьзлери
мен, ызгы кере Алимурат бир неше куьн уьйиндегилер мен телефон аркалы байланыспаганда, ол йорык бир яман зат болганын сезеди.
– Алимурат бек танъ, аьдемлерге уьйкен сый этип билетаган, аьдилсизликти суьймеген аьдем эди. Ол оьзиннен ясы ман да, аьскер исинде толтырган куллыгы бойынша да уьйкен аьдемнен аьдилликти, тувралыкты куьткен. Онынъ тувралыкты суьйген юреги бойсындырылмас эди. Алимураттынъ акында ол бизим данъклы ата-бабаларымыздан коьп затты алган деп айтпага болады. Ога намысы ман бир тилде болув бек маьнели эди, – деп оьз иниси акында эскеруьвлери мен Амир боьлиседи.
Алиевлердинъ аьелиннен согыс спецоперациясы озып турган ерге, янъы нацистлерди сокпага уьш эр-йигит кеткен: агали-инили Муслим мен Рустам эм Муслимнинъ увылы Алимурат. Муслим мен Рустам бу куьнлерде де эр борышын намыслы толтырадылар. Алимурат болса, Эли уьшин яс
янын аямады. Янъыларда берк юрекли эр киси Муслим мен хабарлап, мен онынъ Кудай язганынынъ
алдында шыдамлыгы эм разы болувына сукландым.
– Алла –Таала мага увылымнынъ камырынынъ касында дуа этпеге амал бергенине бек шуькир этемен. Биревге де, душпаннынъ оьзине де мен аьвлети дав майданда, сес-хабарсыз йок болсын деп йорамас эдим. Сегизинши майда мен увылым ман занъ согып, соьйледим. Биз видео-байланыс пан коьристик. Алимурат 2 юма узагына бизи мен байланысып болмаягын билдирди. Мен онынъ коьзлеринде бир аьлемет янган отты сезбей болмадым, сол мени бек тынышсызландырды.
Сондай коьзлерди мен бир россия йигитинде коьрген эдим. Коьп кеш калмай, сол яс оьзи
ялгыз душпаннынъ блиндажына етип, сонынъ ишиндеги яв аьскершилерин баьрин де йок
эткен.
Сонъ мени мен ызгы кере соьйлеген куьн Алимурат анасы ман да, агасы ман да соьйлегенин эситтим. Ол яшавында энъ де ызгы кере борыш толтырмага бараятканын билгенлей кимик, аьр биримиз бен
аманласып, кешируьв тилеген. 2025-нши йылдынъ курал айынынъ 15-нши куьнинде Алимурат сес-хабарсыз йок болды деген билдируьв келди. Мен баьри затты да анъладым, ама орысша айтканда, сеним деген энъ де сонъгы болып оьледи. Сеним меним юрегимди йылытып турды, ама 10 куьннен увылынъыз дуныядан кешти деген куьннинъ коьзининъ оьзининъ ярыклыгын каранъа эткен авыр
хабар келди», – деп Алимураттынъ атасы, СВО катнасувшысы Муслим Алиев хабарлайды.
Бизим йигитлердинъ коьзлериндеги элине каратылган суьйим оты явды ягып соьндирсин, тек олар уьйлерине аман-эсен кайтсынлар. А Россия Элимиз уьшин янын берген йигитлер болса, дайым бизим
юреклерде яшарлар. Олардынъ атлары дайым да Россиядынъ тарихинде калар.
Нурият Кожаева.
Суьвретлерде: Алимурат Алиев, А.Алиев атасы ман.