Янъы басланган 2026-ншы йылда неонацист Киев етекшилерине карсы юритилип турган согыс спецоперациясына тезден тувра 4 йыл толады. Сол шаклы заман ишинде сонынъ туьрли яваплы ерлеринде бизим дагестан-ердеслеримиз, олардынъ эсабында Ногай районымыздынъ йигитлери де, белсен ортакшылык этедилер.
Червленные Буруны авыл яшавшысы Арслан Толубаев ерли орта школадынъ 9 классын окып биткен сонъ, уьйшилигинде ата-анасына коьмек этетаган эди. Сонъында ясы еткенде, оны аьскер сырасына шакырдылар, эм ол 1996-ншы йылдан 1998-нши йылга дейим Тувган Эли алдында оьзининъ эр борышын уьстинликли толтырган. Болса
да Аталыктынъ шынты коршалавшысы болмага ога 2024-нши йылдынъ 26-ншы июлинде Россия Коршаланув министерствосы ман келисуьв туьзип, СВО катнасувшылар сырасына йолланган шагында амал табылды.
Уллы сержант Арслан Толубаев согыс ерине келген биринши куьниннен алып оьзин шынты эр, йигерли эм аьскерши антына алал болган инсан этип коьрсетеди. Уллы сержант Арслан Толубаев фронт йолдаслары ман бирге 2024-нши йылдынъ август айында кезекли кавга борышын толтырып турган аьсерде оьзин баьтир аьскерши этип таныткан. Сол йигитликтинъ акында «Кызыл аьскерши» деп аталган Москва аьскер округынынъ газетасында согыс хабаршысы Борис Войновтынъ «Кабарда» куьбининъ марафон согысы» деп аталган макаласы баспаланган.
Ис булай болган. 2024-нши йылдынъ 27-нши августында «Марафон» деген аты болган гвардия лейтенанты Виталий Самородовтынъ штурм ротасы Песчаное деп аталган авыл ювыгындагы ерлерди явдан босатув бойынша согыс борышын толтырувга кириседи. Штурмовиклер куьбининъ сырасында гвардия рядовойы Аскерби Пшихачев (фронттагы аты «Кабарда»), гвардия уллы сержанты Арслан Толубаев (фронт аты «Даг») эм гвардия киши сержанты Альберт Сагаан (фронтта «Тунгус») болып, ашык ер уьсти мен, душпаннынъ топларынынъ эм дронларынынъ атувларына карамастан, 5 шакырымды оьтип, явдынъ сыртына шыгады эм сол ерде ок согысып баслайды.
Мунда аьскершилер согыс аркасы ман неонацистлердинъ беркитуьвлерин тартып аладылар эм сол куьннинъ кешесинде эм сонъгы эки сутка ишинде бу ерге бизикилер етискенше соларды явга бермей турганлар. Душпан сол куьнлерде оьз беркитуьвлерин кери кайтарып алув ниети мен коьп кере оларга карсы коьтерилген. Уьш йигитке тускап
явлар оьзлерининъ хыйлы куьшлерин йибергенлер, оларды минометлар эм бронетехника алатлары ман атып турганлар.
«…Алган коьп яраларына да карамастан, гвардия рядовойы Аскерби Пшихачев куьпти етекшилеген, укронацистлер мен согысты бардырган, яралы йолдасларынынъ коьнъиллерин коьтерген эм оларга медициналык ярдамын этип турган.
… «Даг» эм «Тунгус» сол ок заманда «Кабарда» ман бир ерде турып фронт йолдасына баьри болган коьмекти эткенлер – яралы аьскершилер пулемет точкаларын ярастырып, душпаннынъ атувын япырганлар эм оны сол ерден кери кувганлар. «Кабардадынъ» куьбининъ йогары дав усталыгынынъ эм биргелесип аьрекет этуьвининъ сырагысында явдынъ контратакага коьтерилмеге деген ымтылыслары токтатылган, ол хыйлы аьдемлерин эм техникасын йойган. Сондай кавга етимислери «Марафоннынъ» штурм ротасына сол ерде беркитуьвлер туьзбеге эм фронттынъ стратегиялык маьнели кесегинде алдыга барувды оьрлентпеге амал берген.
Оьзлерининъ коьрсеткен эрлиги эм баьтирлиги мен гвардия рядовойы Аскерби Пшихачев, гвардия уллы сержанты Арслан Толубаев эм гвардия киши сержанты Альберт Сагаан оьз атларын Шавлин полкынынъ данъклы тарихине оьмирлерге яздыртып калдырдылар», – деп язады сол эстен кетпес йигитлик акында киши сержант, «Кызыл
аьскерши» газетадынъ военкоры Борис Войнов.
Сол 2024-нши йылдынъ октябрь айынынъ ызында Толубаевлердинъ аьели олардынъ увылы Арслан Курпаевич 29-ншы август куьнинде ЛНР эм ДНР ерлеринде СВО аьсеринде аьскершилик борышларын толтырып турган заманында сесхабарсыз йок болган деген билдируьв алганлар. Ол зат сол согыста болган. Билдируьв, элбетте, куванышлы тувыл, ама соны ман бу иске токтав белгисин салмага ярамайды. Толубаевлердинъ аьелине: Арсланнынъ анасы Сапиретке, хатыны Наиляга эм кызы Мединага
ян берклигин, танълагы куьнге сенимликти ак ниет пен йораймыз. Ийгиликке сенимлик пен тек алал, берк эм йигерли юрек куьтеди. Олар эм бизим халкымыз Арсландай баьтир, данъклы эм оьзининъ Тувган Элине алал болган аьскерши мен дайым да оьктемсимеге керекпиз!
М-А.Ханов.
Суьвретте: Арслан Толубаев.
