Ердесимиз Биболат Руслан увылы Нургишиев, Элимиздинъ яшавшыларынынъ йогарындагы тынышлы коьктинъ парахатлыгы эм коркынышсызлыгы
уьшин яс яшавын аямай, Аталыгына намыслы кызмет этип келди. Биз ердесимиз акында эстеликти аявлап саклаймыз, онынъ коьрсеткен йигитлиги –
ясларга коьрим. Биболат мектебте окув йылларыннан алып яшавын аьскершилик службасы ман байланыстырмага мырат эткен. Душпан Элимиздинъ япсарына ювык янасканда, ол яс яшавын аямай, коркувды билмей, согыс спецоперация юрген ерге Элин коршаламага йол алды.
Биболат Нургишиев 1997-нши йылдынъ тамбыз айынынъ 20-ншы куьнинде Кизляр районынынъ Бурумбай авылында тувган. Алты ясында онынъ аьели Сургут районынынъ Федоровка авылына коьшеди, онда ол балалар бавына юрген, оннан сонъ мектебте билим алган. Болса да ясты оьз тувган ерине тартатаган эди. 11-нши классты яс Кизляр районынынъ Нововладимирское авылында тамамлайды. Аьелде тунъгыш бала болганга болар, ол оьз ата-анасы, иниси Махмат эм карындасы Малят уьшин оьзин дайым яваплы этип сезген. Яс куллыксуьер, аьдил эм оьзиннен эм баскалардан да яваплылы болувды талаплап келген. Мектебтен сонъ ол нефтяной техникумына туьсип, билим алды.
Анасы Зульфиядынъ айтувы ман, Биболаттынъ бала заманыннан алып коьзлери бек осал коьретаган эди. Сол маьселе аьскер сырасында кызмет этпеге онынъ бала шактан эткен мырадына буршав берер деп, яс кыйналатаган эди. Анасы дайым онынъ касында болды, врачларга коьрсетти. Заман оьтип, сулыплы окулистлердинъ ярдамы ман ястынъ коьз коьруьви оьткирленип баслады, ама коьзилдирикти яс таслап болмады. Аьскерге шакырув кагытын колына алувы онынъ энъ суьйинишли куьнлерининъ бириси болды. Ердесимиз Бурятияда танк аьскеринде кызмет этти. Аьскер сырасында биринши куьннен алып
нызамлы, оьз антына алал аьскерши деп сый-абырай казанып, оьзин яваплы эм нызамлы аьскерши этип коьрсетти. Заман оьтип, Биболаттынъ анасы Зульфия киши сержант увылынынъ службасынынъ етекшилеви атыннан йиберилген Разылык хатларын алып баслады. Эр борышын толтырганнан сонъ, Биболат Ханты-Мансийск автоном округына кайтып, «Сургутнефтегаз» организациясына куллыкка ерлеседи. Яшав оьз йорыгы ман барды, ама согыс спецоперация басланганда, коьп зат туьрленди. 2022-нши йылдынъ кырк кийик айында Биболат Руслан увылы Нургишиев мобилизация бойынша СВО еринде явга карсы шыкты.
Гвардиядынъ киши сержанты Биболат Нургишиев «Бейбарс» деген шакырувы ман душпан ман йигитлерше согысып, йигитлик эм коркынышсызлык коьрсетип келди. Эр борышын толтырганда, алган шыныгув эм аьскерлик сулыбы согыс оьзгерислеринде яска бек керектилер. Ястынъ энеси, согыс эм ис
ветераны Юзефа Ималиевна Суюновадынъ согыс йыллары акында йиенине айткан хабарлары, онынъ Эли уьшин коьрсеткен шынты патриотизми Биболатка савлай яшавына уьлги болдылар. СВО еринде каты урысларда коьплеген аьскер борышларын толтырувда аьскерши онлаган неонацистлерин йок этти.
Ол каты урысларда оьз йолдасларынынъ яшавларын коьп кере куткарып келди, онынъ экипажы алдына салынган борышларын етимисли толтырып келуьви мен, коьптен сакланган Енъуьвди ювыклатувда оьз уьлисин косты. Ердесимиздинъ согыс спецоперация барысында ортак Енъуьвге косымы, аьскер борышын толтырувда коьрсеткен йигитликлери туьрли савгалары ман да белгиленген. Ол «За спасение погибавших», «За боевые отличия» эм «СВО катнасувшысы» деген медальлерине тийисли этилген.
Оькинишке, 2025-нши йылдынъ курал айынынъ 9-ншы куьнинде гвардия киши сержанты Биболат Руслан увылы Нургишиев аьскершилик борышын
толтырувда йигитлерше ян берди. Ердесимиз оьлгеннен сонъ Йигитлик орденине тийисли этилди. Онынъ аты шынты йигитликтинъ уьлгиси, Элине алал болувы, эли уьшин янын курман этуьви мен аты тарихке дайымга кирди.
Биз Аталыгымыздынъ коршалавшыларын баьтирлигининъ, тиресуьвлигининъ белгиси болган ердесимиздинъ коьрсеткен йигитлигин эсимизде дайымга саклаякпыз.
Г.Нурдинова.
Суьвретте: Биболат Нургишиев.
