Ногай районынынъ Червленные Бурыны авылында согыс спецоперациясын озгарув еринде эли уьшин яс янын курманлык эткен ердесимиз Зинур Джумандыковка эстеликли белги ашылды. Онынъ акында муниципалитет администрациясынынъ пресс-службасы билдиреди.
Замир Акмурзаев атындагы Червленные Буруны авыл мектебининъ выпускниги Зинур Джумандыковка багысланып оьткен сол оьзгерисли шара 7-нши ноябрьде ол
окыган мектеб меканында шатлыклы аьлде озгарылды.
Червленные Буруны авыл яшавшысы Зинур Джумандыков 2024-нши йылдынъ ноябрь айында Курск областин явдан босатув уьшин юритилген урыслардынъ барысында, оьз яшавын курман этип, явдынъ оты астыннан яраланган эки йолдасларын оьлимнен куткарган. Сол коьрсеткен йигитлиги уьшин ол РФ Президентининъ Указы ман оьлгеннен сонъ Йигитлик орденине тийисли этилинген.
Йигит ердесимиздинъ атын оьмирлетуьв ниетин яшавга шыгарувды авыл администрация аькимбасы Рустам Абдулбариев баслаган. Ол элимиздинъ кавыфсызлыгын
канагатлав уьшин яшав оьмирлерин кыскарткан баьтирлер акында эс сакланувдынъ маьнелигин белгиледи. Мектеб директоры Тамара Кулаева мемориальлик тактасын ерлестируьвде себеплигин тийгисткен авыл етекшисине педагогикалык коллективи атыннан оьз разылыгын билдирди эм Зинур Джумандыковтынъ йигитлиги келеектеги несиллер юреклеринде дайымга сакланаягын белгиледи.
Шарада район администрация эм ямагат организациялар ваькиллери ортакшылык эттилер. Ногай район аькимбасынынъ орынбасары Мурат Шадиев Зинур Джумандыковтынъ йигерлигин эм аьскерлик борышына алаллыгын белгиледи. Баьтирдинъ анасы эм аданасы Зинур акында эскеруьвлери мен боьлистилер, оьз кайгырувларын эм оны ман оьктемсийтаганларын белгилеп.
Мемориальлик эстелик белгисин ашпага ыхтыяр Зинур Джумандыковтынъ анасына эм аданасына берилди. Йыйылганлар баьтирди бир такыйка уьндемей турув
ман эскердилер эм эстелик туьбине шешекейлер байламларын салдылар.
Бу оьзгерис – ортак онъайлыгы уьшин яс янларын бергенлер эстелигине сый этуьвдинъ маьнелиги акында эске салув. Мемориальлик такта Зинур Джумандыковтынъ баьтирлигинъ белгиси болар эм ясларда патриотлык сезимин тербияламага керегин эске салар.
