Быйылгы кыс оьзининъ карлы эм аязлы сувык куьнлери мен элге эм халкка заьлимдей кыйынлыклар да тувдырып оьтеди. Янъыларда Ногай районынынъ Червленные Буруны авылындагы бир электротрансформатор сынган эди. Кыс куьнинде бир хыйлы кесек уьйлер электроярыксыз калдылар. Уьйлерде болса картлар, балалар, авырыган аьдемлер бар. Ногай районнынъ энерготармаклар етекшиси Рамиль Муслимов эм бас инженер Каирбек Муталимов кыска заманнан, эки саьат
ишинде, кулланувдан тайган электротрансформатордынъ орынына баскасын таптылар. Соны ерине еткеруьв, орынластырув эм ортак электролиниясына косув ислерди
аьрекетли аьлде РЭС специалистлери яшавга шыгардылар. Сондай аьрекетли куллыктынъ сырагысында авыл яшавшыларынынъ уьйлерине кыска заман ишинде
электроярыгы еткерилди.
Авыр кыс заманында баьри соравларды да шетке койып, Ногай РЭС етекшилери эм куллыкшылары бизге, яшавшылар уьшин, уьйкен кыйын салганын белгилеймиз.
Олардынъ аьр бирисине, сонынъ ишинде Червленные Буруны авыл участогынынъ мастери Магомед Османовка, электромонтерлар Рашид Аубекеровка, Мурат
Алимуллаевке, Идрис Сабутовка, РЭС водительлери Бегали Кузеевке, Камиль Оразалиевке уьйкен разылыгымызды билдиремиз. Сизге, аявлы энергетиклер, берк
ден савлыкты, аьеллеринъизде эмишликти, наьсипти, янъы ис уьстинликлерди йораймыз!

Червленные Буруны авыл яшавшылары.