Аталыкты Коршалавшы байрамы алдында Ногай районынынъ етекшиси Джамалутдин Эсиргепов СВО барысында Тувган ери уьшин янларын курман эткен бизим йигитлеримиздинъ аталары ман йолыгыс оьткерди. Онынъ акында муниципалитет администрациясынынъ пресс-службасы билдиреди.
Йолыгыс йылы аьлинде оьтти. Шарада Ногай районынынъ власть органларынынъ, ямагат организацияларынынъ эм ветеранлык структураларынынъ ваькиллери ортакшыладылар: район Депутатлар йыйынынынъ председатели Алибек Менласанов, ДР Ямагат палатасынынъ агзасы, район Хатынкызлар советининъ председатели Асият Манкаева, район Ямагат палатасынынъ председатели Эльмурза Саитов, Согыс, ис, Савытлы куьшлер эм ыхтыярсаклав органлар ветеранларынынъ район советининъ председатели Акманбет Сангишиев, Ногай район бойынша КЦСОН начальниги Хамидулла Саитов, район аькимбасынынъ ямагат кавыфсызлыгы бойынша орынбасары Мурат Шадиев, «Аталык коршалавшылары» патшалык фондынынъ Социаллык координаторы, согыс урысларынынъ ветераны Аскерхан Межитов, «Яслык» яслар орталыгынынъ начальниги Абибулла Шамбилов.
Шара барысында район етекшиси йыйылганларды киели Рамадан айынынъ басланувы эм Аталык Коршалавшы куьни мен кутлады. Джамалутдин Айнадинович ян берген СВО катнасувшыларынынъ аталарына увылларын соьйтип йигитлерше тербиялаганы уьшин уьйкен разылыгын билдирди эм баьри йыйылганларга берк ден савлыгын эм ян берклигин йорады. Аталыкты Коршалавшы куьнининъ сыйына СВО катнасувшылар аталарына разылык хатлар эм эстеликли савкатлар тапшырдылар.
Ногай район администрациясынынъ пресс-службасы.