Яшав. Аьдем. Ер юзининъ бир муьйисинде яшайды аьдем, етекши де тувыл, эл сырасында биревдинъ арасында да айырылмайды. Яшай келе, неше йыллап билген аьдемди, тагы да неше йылдан сонъ коьргенде ойлайсынъ, бир кепте сабыр, хабарлаганда алгаспай, аста-акырын соьйлеп турады деп. Мен бу кыскаяклы ман мектебте окыйтаган шактан алып сукланатаган эдим, аьли де, коьз алдыма
илингендей болса, карасымды таслай берип, бу аьли де сол баягы касиетли экен деп ойлайман:
сабырлыгы, парахатлыгы ман баскаланады. Яшавында бир кыйынлык та коьрмеген деп ойламага
болаяк, бирде «кыйын» болды деген соьзди авызыннан шыгармаган. Янына оьткен, юрегине тийген
хабарды да тавысын эш бир туьрлендирмей, тегис сеси мен айтады. Бу кыскаяклы ким десенъиз, айтайым: ол – аьвелгиде Кумлы авылында тувып-оьскен ердесимиз Ава Телеева. Мунда оьткен онынъ завыклы балалык эм оьспирлик йыллары. Ерли мектебте билим алып, ол Махачкаладынъ политехникалык техникумын окып битирип, бухгалтер-экономист деген кесписининъ иеси
болды. Ис аьрекетин Тарумов районынынъ Имунный авылында сайлаган кесписи бойынша куллык
этуьвден баслаган. Шагы еткенде, Каякент районынынъ Усемикент авылынынъ кумык миллетли яс йигити Умар ман бас косып, аьел курады. Татым аьелде дуныя юзине ызлы-ызыннан уьш саьбий энеди. Оларды асырап-саклав ман каьрлейди.
Ама бактынъ кайтип туьзилеегин, яшавда не болаягын билип болмайсынъ. Эрге шыгып, яшап турганда, Авадынъ анасы тыншайды, тоьгилип балалары калды. nЭрин алып, шоьлимиздинъ кенъ тоьсинде яйрап конган Кумлы авылына коьшпеге амалсыз болды, оьз балаларынынъ уьстине балалар косып: олай деген, эндигиси ога оьксиз калган аданасларына эм синълилерине бавыр этип, оларды ата-ана эсабында асырап-оьстирип, яшавдынъ уьйкен йолына салмага керек болды. Сол йылларда Ногай районынынъ Ленин атындагы совхозынынъ Кумлы авыл боьлигинде Ава балалар бавында завхоз болып иследи. Аданасларына, синълилерине ол аьли де – ата-ана орынында. Сол балалар баьри де оьскенлер, уьйли-эсикли де болганлар…
Сонъ ерине кайтып ис аьрекетин Усемикент авылдагы сбербанк филиалында контролер-кассир
болып ислеп, яшав оьмирин оьз агымы ман бардыра береди. Энъ кишкей синълиси мектебти битирип, армаган окувга туьскенде, оьзининъ эки кызы да студентлер эдилер. Уьш балады окытув деген енъиллерден тувыл болса да, ол бир де тис ярып шагынмаган, йыланмаган. Уьйкен кызы Эльвира, Сургут каласынынъ медуниверситетин окып кутарып, сол калада буьгуьнлерде биринши категориялы врачотоларинголог эм сурдолог болып куллык этеди. Экинши кызы Аминат, Махачкалада педагогикалык университетин окып битирип, балаларды билимлендируьв мен каьрлейди. Кишкей кедеси Артур элимиздинъ сырт бетиндеги Сургут каласында яшайды эм сонда
«Сургутнефтегаз» ПАОда куллык этеди. Тек яшав кыскаяклыды тагы да сынады: синълилерининъ бириси каты авырыды. Эм мине соннан алып узак заман бойы ога эндигиси синълисин уьйине аькелип, заман-заманы ман каратып, саклап турмага туьседи. Шеттен карасанъ, неси бар карамай, оьзининъ синълиси ше деп ойлаяклар, ама авырувлыды карав тыныш тувыл экени биревге де ясыртын тувыл. Эсиме туьскенде, туьрли ой-сезимлерге бийленип, не куьшли хатын, неше йылдан
бери, яшав авырлыгын, яшавдынъ каты сынавларын басыннан оьткерип, сабыр болып, шамланмай,
карланмай кайтип турады экен деп ойлайман. Куьшли дегеним, кышкырып, акырып тувыл,
Алла-Таала берген сынавды бир соьзсиз коьтерип билген аьдем экени аян. Тийисли тыншаювга
еткенше Ава предприниматель болып ислеген.
Бу куьнлерде Ава эри Умар ман – тийисли тыншаювда. Олар балаларына, аданасларына, синълилерине, олардынъ аьеллерине, кардаштувганларына савлык, эмишлик болсын ер юзинде деп тилек тилеп яшайдылар.
Э.Азилова.
Суьвретте: Ава Телеева.
