Йыл сайын кырк кийик айынынъ 1-нши куьнинде яс несилде патриотизм, йигерлик, эрклик, Аталыкка суьйим касиетлерин тербиялав ниет пен Россия мектеблеринде «Йигитлик дерислери»
деп аталып, класс саьатлери оьтедилер. Сондай шара А-Х. Джанибеков атындагы мектебининъ 9-ншы «в» классында озды. Класс етекшиси Нафисат Бекмухамбет кызы Ярлыкапова окувшыларга бизим
элимиздинъ тарихининъ данъклы бетлери акында хабарлады. Балалар шарада белсен катнастылар, инсаннынъ патриотизм, йигерлик касиетлери акында соьйленди, «баьтирлик» деген соьздинъ маьнеси ашылды. Окытувшы буьгуьнги элимизде болып турган оьзгерислери акында айтты,
СВО еринде россиянлылар, солардынъ ишинде дагестанлылар да бар, коьрсететаган
баьтирликти белгиледи. Нафисат Бекмухамбет кызы согыс спецоперациясында куллык этетаган мектеб выпускниклери акында хабарлады.
Шарадынъ конаклары болып мектебтинъ тарих окытувшысы Альмира Башир кызы Мурзаева эм «Шоьл тавысы» республикалык газетасынынъ корреспонденти, шаир Гульфира Абудин кызы Бекмуратова келдилер. Олар окувшыларды янъы окув йылы ман кутладылар эм уьстинликлер
йорадылар. Г.Бекмуратова Джанибеков атындагы мектебтинъ выпускниги, согыс аьрекетининъ ветераны, 1999-ншы йыл Дагестан Республикасына шапкынлык эткен халклар ара террористлерге карсы турганлардынъ бириси Баймагомед Амин увылы Ярлыкапов (яткан ери ярык болсын)
акында хабарлады. Окувшылар тып-тынык болып тынъладылар данъклы ердеси акында. Солай ок газетадынъ куллыкшысы журналистлер СВО еринде болып турган оьзгерислердинъ акында кайтип язатаганы акында айтты. Йигерлик – коркыныштынъ йоклыгы тувыл, инсан, коркса да, баьтирлик этеди. Сол намыслык пан яшайтаган аьдемлерде шыгатаган касиет – ювыкларды коршалав, акыйкатлык уьшин куьрес, борышын толтырув уьшин баьри кыйынлыклардан оьтуьв. Баьтирлик тек согыс майданда тувмайды, ол бизим касымызда – керексинетаганга коьмек этуьв, оьзининъ дурыс тувыл экенинъди аянлав, аьдилсизликке карсы турув. Сол затлар акында айтылды класс саьатинде. Аьр бир бала анълады, аьдемнинъ энъ де уьйкен борышы – Аталыкты, Уллы Россияды суьймеге, коршаламага.
Бизим хабаршы.
Суьвретте: класс саьатининъ катнасувшылары.
